Зошто ВМРО-ДПМНЕ е против тоа вработените во здравството, образованието и социјалната заштита да добиваат повисоки плати. Зошто на ВМРО-ДПМНЕ му пречи растот на платите во клучните сектори?Над 53 илјади вработени во здравството, образованието и детските градинки добиваат покачување на платите за 5 отсто и тоа почнувајќи од септемвриската плата. Таквото покачување, освен што носи повеќе пари во над 53 илјади семејства, дополнително ќе влијае и на спиралата на раст на платите, се вели во реакцијата на СДСМ.

Според партијата, унапредувањето на јавното здравство, социјалната заштита и образованието се врвен приоритет на Владата предводена од СДСМ, затоа што токму тие се темелите на општеството. Влогот во човечки капитал е влог за квалитетни и задоволни наставници, поквалитетно образование, како и квалитетни и задоволни доктори во јавното здравство.

,,Трендот на растот на платите ќе продолжи во годините кои следат, а со влезот во Европската унија и НАТО, растот на платите ќе добие забрзано темпо.Позитивен пример за тоа даваат искуствата на Бугарија каде што по влезот во ЕУ просечната плата пораснала двојно, како и искуството на Романија каде што просечната плата по влезот во ЕУ пораснала четирикратно.Бидејќи како држава се стремиме за ЕУ и НАТО интеграции и подигање на стандардот на платите, засилено се работи на создавање на еден нов систем на плати со кои вработените ќе добиваат достоинствено зголемување , како одговор на достоинствените и благородни професии кои ги извршуваат”, се додава во соопштението.

Сега не е време за измислување непостоечки теми, туку за одговорност. ВМРО-ДПМНЕ треба да се помири со тоа што растат платите и се гради современ европски здравствен систем. Македонија конечно тргна напред и тоа е воочливо во многу сфери, вклучително и во здравството, се вели во реакцијата на СДСМ.

Според партијата, над 19.000 здравствени работници ќе земаат повисока плата веќе од следниот месец, а се воведе и зголемување на надоместокот за прекувремена работа, дежурства и ноќен труд.

,,Преземени се значителни чекори во обезбедувањето на квалитетни и достојни услови за работа на лекарите со зголемувањето од 5 отсто на платите на здравствените работници. Набавката за која денеска ВМРО-ДПМНЕ лажно обвинува е интервентна набавка поради итност, со цел пациентите да не останат без лекови. Станува збор за набавка којашто е вообичаена, нормална и законски спроведена.ВМРО-ДПМНЕ знае дека ваквите јавни набавки ги спроведува секоја клиника посебно, а не Министерството за здравство.Не е сега време за измислување непостоечки теми за партиски препукувања. Сега е време за државничко, одговорно однесување и обединување околу македонската иднина, околу интересите на граѓаните”, е ставот на СДСМ.

Според партијата, време е раководството во ВМРО-ДПМНЕ матрицата на лажни вести и измислици да ја замени со одговорно и државничко однесување. Време е ВМРО-ДПМНЕ да ги повика своите членови да излезат на референдумот ЗА европска Македонија и да изберат иднина.

Живееме живот во кој поразите стануваат секојдневие, а победите ги нема, рече Сашо Донев, претседател на оштинскиот комитет на ВМРО-ДПМНЕ во Охрид, во повикот за протестниот марш кој во овој град е закажан за утре.

Тој истакна дека граѓаните се разочарани од Владата на СДСМ, чии лаги, како што кажа, излегле на виделина.

„Државата пропаѓа, граѓаните живеат се полошо, а Заев ги распродава националните и државните интереси.  Наместо живот донесoa чемер и јад. Економијата тоне, цените растат, а стандардот опаѓа, земјоделието е на колена, здравството и образованието колабираат, безбедносниот систем е целосно разнишан“, изјави Донев и додаде дека граѓаните се свесни што се случува во државата, па, како што рече, во огромно мнозинство нема да дадат поддршка на штетниот и капитулантски договор.

„Договорот е штетен и власта го знае тоа, затоа и бегаат од одговори. Заев се плаши, затоа и бега од дебата и соочување, затоа што нема аргумент за губењето на институционалниот идентитет, историјата, културата и традицијата“, рече претседателот на оштинскиот комитет и подвлече дека ВМРО-ДПМНЕ не го поддржува договорот, ниту некогаш ќе го поддржи.

„Од нас зависи каков пат ќе избереме. Македонија е се што имаме, нашите корени и нашата иднина“, истакна Донев и ги повика сите незадоволни граѓани од, како што кажа, капитулацијата на Зоран Заев да се придружат на протестниот марш во Охрид, во недела со почеток во 13 часот.