Партијатa на пензионери преку писмена реакција го осудува, кaко што велат од таму, лицемерното, срамно, ненародно и деструктивно однесување на пратениците од опозиционите ВМРО-ДПМНЕ, Алијанса на албанците и Алтенатива.

Од оваа партија потенцираат дека тие наместо да стојат на дадениот збор за деблокирање на Собранието, по којзнае којпат потврдија дека никогаш искрено не се залагале за потребите на социјално засегнатите граѓани, работниците и економијата.

„Пратениците на опозиционите ВМРО-ДПМНЕ, Алијанса на албанците и Алтернатива, користејќи го фактот дека мнозинството во Собранието, кое е тесно, поради епидемијата со Ковид-19 ќе се соочува со проблем за обезбедување на потребен кворум за работа, со непринципиелни и подли преседани и постапки, кои во основа секогаш се на штета на граѓаните и по кои се познати во целиот период на нивното делување, со месеци го држат во ‘заложништво’ Собранието и неопходно потребната помош за голем број граѓани, компании и економијата, а сега го одложија донесувањето на петтиот пакет на мерки за помош“, посочуваат од партијата на пензионерите.

Тие напоменуваат дека „Договорот“ за одблокирање на Собранието е општ, и тој покрај другото условува и меѓусебно да се повлечат, можеби и претходно заемно договорени, илјадници амандмани, со кои воведоа пресадан за вршење непринципиелен притисок за сè и сешто. Договорот всушност подразбира дека позицијата и опозицијата нема да го злоупотребуваат отсуството на заболените пратеници од Ковид-19.

„Пратениците од ВМРО-ДПМНЕ и АА, понесени од сопствените фрустрации, а во обид да се прикажат како ‘добрите момчиња’, пак се вратија на тоа што најдобро го знаат да манипулираат, спинуваат, да ја искривуват вистината и тоа секогаш на грбот на народот. Но граѓаните го ‘прочитаа’ нивното лицемерие и лажен патриотизам оптоварен со завист, подмолност, конфликтност и деструкција“, реагираат од оваа партија.

Нема вакцини, а Филипче зборува за континуирана, дури и масовна вакцинација, реагираат од опозициската ВМРО-ДПМНЕ.

Според нив, Филипче покажал дека не може да обезбеди вакцини навреме.

„Фактот е еден – вакцинацијата во Македонија доцнеше! Додека сите веќе вакцинираа во декември, Македонија почна да вакцинира со донацијата од Србија во втората половина на февруари. Во меѓувреме, нема ни доволно реагенси, нема ни тестови на коронавирус. За Филипче, мерките дале резултатите и тој повторно се враќа на својата омилена, ама сосема погрешна констатација – ситуацијата е под контрола“, стои во писмената реакција од оваа партија.

За сето ова, велат од ВМРО ДПМНЕ,Филипче треба да замине од функцијата и да одговара.

Од опозициската ВМРО-ДПМНЕ реагираат на најавата на градоначалникот на Скопје, Петре Шилегов, за отворање оглас за нови вработувања во ЈСП „Скопје“.

„Дали неспособниот Шилегов од Скопје од ЈСП прави фирма за удомување партиски активисти? Огласот за 175 нови вработувања во ЈСП, од кој повеќето не се шофери, кои се дефицитарни, е полнење на администрацијата на оваа претпријатие. Во ек на пандемија, кога секој денар е важен и наместо тој да се искористи за таблети, тестови или вакцини, се троши за партиски вработувања“, велат од оваа партија.

Тие сметаат дека ЈСП има недостиг на шофери, но, како што велат, тоа за Шилегов не е проблем, „негова преокупација е како да вработи оперативен директор, советник за примена на јазиците и инженер за инвестиции во ЈСП“, стои во писменото соопштение од партијата.

„Шилегов го претвори ЈСП во фирма за удомување партиски кадри, а Скопје има делови каде што нема канализација, имаме нечисти улици, диви депонии насекаде, градот буквално тоне. И сѐ додека е Шилегов, градот ќе тоне“, додаваат од ВМРО-ДПМНЕ.