Од СДСМ преку соопштение информираат дека изминатите недели Христијан Мицкоски, Александар Николовски, Влатко Ѓорчев и други високи функционери на ВМРО-ДПМНЕ често биле во хотелот Мериот.

„Белиот дворец е во паника по донесената пресуда за предметот „Тврдина-Таргет“, бидејќи Мицкоски не успеа да го спаси и заштити криминалот на режимот. Правдата е тука, законите важат за сите подеднакво, Мицкоски е поразен и од правдата и од граѓаните. Јасно е дека спрегата Мериот-Белата палата се уште раководи со ВМРО-ДПМНЕ“, велат од СДСМ.

Според нив, на граѓаните останува да проценат зошто партиски настани на ВМРО-ДПМНЕ се организираат токму во Мериот и дали тоа можеби е поради долгот на Мицкоски кон Сашо Мијалков кој заедно со Груевски го стави на чело на ВМРО-ДПМНЕ“, реагираат од партијата на власт.

Додаваат дека, Мицкоски е најповикан да одговори дали се среќавал и со Сашо Мијалков, и според нив, правдата и силната реакција на институциите го спречиле сценариото на Мицкоски, Груевски и Мијалков.

Од владеачката СДСМ влеат дека економските мерки дале резултати, а просечната плата за три години пораснала за скоро 4.500 денари.

„Просечната плата во декември 2020 година изнесуваше 28.294 денари, што е за пет отсто повеќе во однос на декември 2019 година. Просечната плата за три години, од декември 2017 до декември 2020 година, порасна за 18,63 отсто односно за речиси 4.500 денари од 23.850 на 29.294 денари“, анализираат од СДСМ.

Според нив, растот е три пати поголем во однос на периодот од 2014 со 2017 година, последните години од владеењето на ВМРО-ДПМНЕ, кога просечната плата пораснала за 6,44 отсто, односно за 1.443 денари.

„СДСМ се грижи за граѓаните, веднаш по преземањето на мандатот ја зголемивме минималната плата на 12.000 денари а потоа и на 14.500 и ја израмнивме во сите сектори“, велат од оваа парија.

Додаваат, дека ќе продолжат со реализација на политики кои обезбедуваат подобар животен стандард и брз економски раст.

Коалицијата Заев – Мијалков сè повеќе излегува на виделина. А доказите се насекаде. Мијалков се појавил во Јавното обвинителство во 16 часот, а театарот пред камерите го прави во 16.40 часот, тврдат од ВМРО-ДПМНЕ.

Од партијата прашуваат што правел Мијалков 40 минути и дали ЈО го пуштило да прави циркус пред камерите?

„Мијалков, наместо веднаш во куќен притвор, глумел изненаден и му правел на Заев простор за промоција. Дали Мијалков во ЈО е донесен со службен владин црн автомобил ‘фолксваген пасат’? И каде бил претходно? Две минути откога се снима Мијалков пред ЈО, Заев се јавува со фејсбук-објава, каде што се фали дека тој вршел притисок Мијалков да се предаде“, велат од ВМРО-ДПМНЕ.

Од таму додаваат дека режијата е премногу очигледна.

„Заев и Мијалков цело време се во комуникација. А да не беа ВМРО, народот и меѓународната заедница Мијалков сега ќе беше на слобода, бидејќи тоа беше планот на Заев, за да може да прават вештачка криза во ВМРО. Планот на Заев пропадна. Одговорност мора да има за сите, па и за Заев“, пишува во соопштението.