Јавното обвинителство молчи, фактот што Седат Пекер добил полициско обезбедување од Спасовски нема да избледи, одговорност ќе има за сите, соопшти ВМРО-ДПМНЕ.

„Не може светски криминалец како Седат Пекер три месеци да престојува во Македонија, а МВР на Спасовски да му даде и полициско обезбедување.

Дополнително уште поненормално е зошто ЈО молчи и не отвори истрага, како Пекер се стекнал со полициско обезбедување, што правела АНБ, и што разговарал Заев со него?

Не може 214 криминалци да добијат македонски документи, да доаѓаат во Македонија, од тука да полетуваат насекаде низ светот, а за тоа да бидат виновни службеници од Пасошко.

Полициско обезбедување не даваат службеници од Пасошко, тоа го даваат високи структури во МВР, а тие знаат кој е Седат Пекер.

Се поставува прашањето зошто иако знаеле кој е Седат Пекер, тој добил обезбедување и дали на тоа влијаела неговата средба со Заев.

Одговори и одговорност мора да има“, се вели во партиското соопштение.

СДСМ по 26. редовен конгрес, со кадровски освежувања во највисоките партиски органи, кои се спој на искуство и нова енергија, започнува ново четиригодишно поглавје како локомотива за напредокот на македонската држава и како гарант за исправниот колосек кој води до подобра иднина на сите граѓани, напоменуваат од партијата по вчерашниот конгрес.

Дообјаснуваат дека во составот на новите органи се пресликани вредностите на СДСМ за целосна родова еднаквост, за соодветна застапеност на младите, како и темелните вредности за заедништво преку концептот едно општество за сите.

„Новиот состав на Централниот одбор е освежен, 2/3 од него се нови лица кои досега не биле членови на највисокиот орган на партијата. Остантите, 1/3 веќе биле членови. Од 120 членови во новиот Централен одбор 60 се жени, 60 мажи – целосна родова еднаквост. Млади се 45 членови, што е застапеност од над 37,5 проценти, досега највисоко и во СДСМ и во која било друга партија во Северна Македонија. Покрај тоа што имаме членови на ЦО коишто се Македонци, имаме и припадници на албанската, турската, ромската, бошњачката, српската, влашката етничка заедница. Избрани се и 18 члена на Извршниот одбор на партијата, од кои 9 се жени, а 6 доаѓаат од младите редови на СДСМ. Од 18 члена во ИО само 5 се од стариот состав, од 4 потпретседатели, 2 се нови“, посочуваат од СДСМ.

Од таму додаваат дека новиот Централен одбор, Надзорен одбор, Извршниот одбор и целото раководство на партијата ќе ја реализира владината и партиската програма која ќе значи нова политика со која СДСМ и натаму ќе остане прв во промените.

„Овој состав е нова свежина, нова енергија и младост и гарант дека промените во СДСМ не се ниту случајни ниту стихијни, туку дека се континуитет со кој уште подобро и уште повеќе, посветено им служиме на граѓаните и државата“, сметаат од СДСМ.

Сања Лукаревска, која ги штити фирмите на Заеви, Николовски, која наместо криминал брка путер, и Филипче, кој во пандемија се фати за провизии, не се нови луѓе, реагираат од опозициската ВМРО-ДПМНЕ по вчерашниот конгрес на СДСМ.

„Фирмите на Заеви секој квартал се во врвот на листата на должници за ДДВ, и не видовме ниту слушнавме за некоја акција од УЈП. Тоа е Сања Лукаревска, извршител на Заев. Љупчо Николовски не се пронајде на ниту едно место. Земјоделието го упропасти, па смислија нова функција, каде што наместо криминал брка путер. Венко Филипче од добар лекар се сведе на потрчко на Заев. Наместо да брка вакцини, тој  сред пандемија бркаше провизии. Битиќи не донесе ниту една инвестиција. Имаме 6.200 затворени фирми и 60.000 останати без работа. Царовска тера инает со цела држава. Спротивно на волјата на учениците, родителите и наставниците турка проект од кој корист ќе имаат само тие што ќе ги прават набавките и никој друг“, велат од ВМРО-ДПМНЕ.

Од таму додаваат дека СДСМ е истото старо транзиционо лице на чело со, како што велат, стариот Заев.