Вештачка радост за наводно мнозинство во Собранието на Заев денес дојде до молење за широка влада, зошто знае дека владата ќе му падне, соопшти ВМРО-ДПМНЕ.

„ Византиските игри на Заев не го спасуваат од сигурен пораз. Денес Зоран Заев нуди широка Влада, а неговиот коалиционен партнер Али Ахмети го одбива. А, во суштина и двајцата се договорени.

Бидејќи на Заев му пропадна секој обид за креирање на тензии во ВМРО-ДПМНЕ, препорачуваме неговиот ас и неформален советник Никола Тодоров да се кандидира за претседател на СДСМ како конкурент на Заев па нека победи покорумпираниот во таа партија“ додаваат од опозициската партија.

Идејата за заедничка дејствување за напредокот на државата е визионерство и шанса за демократизација и промени во самите политичките партии, а најмногу во ВМРО-ДПМНЕ, соопшти СДСМ.

„ Зоран Заев, на почетокот на нов четиригодишен мандат како Премиер, само неколку дена после изгласана доверба во Парламентот, подава рака за дебата за национално помирување. Тоа е знак на самодоверба и самоувереност, лидерство и доказ за висока политичка свест за проблемите на граѓаните и политичка широкоградост која е одлика само на политичари за кои државата е пред тесно-партиските интереси. Затоа Зоран Заев ја ужива довербата од граѓаните и предводи напред“ додаваат од владејачката партија.

Неговата визија, како што се наведува, се промени за поддршка на напредокот наместо блокади и враќање назад, промени за поддршка на НАТО и ЕУ, за правда која важи за сите а не за опструкции, за демократија а не режим, за едно општество за сите а не за поделби.

„ Претседателот Заев отвора јавна дебата и се обраќа до чесните членови на ВМРО-ДПМНЕ, кои ги врзува желбата за просперитет на нашата земја, кои се за напредок а не криминално стекнатиот имот на режимот и враќање назад. Тој им се обраќа на сите оние кои ја препознаваат големината и визијата на новиот политички концепт за ресетирање на македонското општество и отстранување на сите аномалии кои како тег го успоруваат развојот и подобрата иднина на земјата. Мицкоски безброј пати покажа дека не е еден од нив.

Затоа, Мицкоски не е адресата до кого е упатена идејата за национално помирување.

Губитникот Мицкоски нема капацитет и кредибилитет да учествува во идејата за национално помирување меѓу најодговорните партии. Тој едноставно не поседува политички капацитет вистински да ја разбере“ заклучува партијата.

Осврнувајќи се на состојбата со коронавирусот во државата, од опозициската ВМРО-ДПМНЕ велат дека бројката на заболени секој ден се зголемува.

„Ситуацијата е под контрола, ама ќе ја ставиме во функција mодуларната болница. За каква контрола говори Филипче додека секој ден умираат граѓани од корона, а нема ни една вакцина? Или на контото ја има само вакцината донирана од Србија. За руската вакцина која ја најавува за до крај на неделава или за в недела некако е несигурен“, истакнаа од ВМРО-ДПМНЕ.

Според оваа партија, истите колчичини на вакцини кои власта ги најавуваше за јануари, за февруари, сега ги најавува за месецов, но датум за ниту една вакцина, како што велат, нема.

„Додека  Филипче се грижи за личните и партиските интереси, луѓе умираат, бројката на заболени се зголемува“, стои во писменото соопштение од ВМРО-ДПМНЕ.