Партијата Алијансата за Албанците денеска изрази жалење што дури и по три години, како што велат, главната цел на договорот од Преспа сè уште не е постигнат.

„Нашата земја е сè уште далеку од отворање разговори со ЕУ иако за три години Владата ги излажа граѓаните најмалку три пати. Духот на преспанскиот договор исто така требаше да се рефлектира и во односите со сите соседни земји, подобрувањето на комуникацијата, решавањето на споровите, унапредувањето на билатералните и регионалните односи, спроведувањето на заедничките развојни проекти и интеграцијата на регионот во Европската Унија“, се наведува во партиското соопштение.

Од партијата на Зијадин Села сметаат дека власта не покажала оти интересот на земјата и граѓаните го става над партискиот.

„Стагнација на реформи, криминал и корупција, партизација на правдата, етничка и политичка дискриминација, се само дел од дамките што ги загрозуваат самиот договор од Преспа и иднината на земјата, како што се очекуваше пред три години“, велат од Алијансата за Албанците.

На 4 јануари 2019 година, пред две и пол години најавуваа дека е потпишан договор за изградба на фотонапонска централа на поранешните наоѓалишта на јаглен во Осломеј и дека истата инвестиција ќе биде готова за една година, реагираат од ВМРО-ДПМНЕ откако премиерот Заев објави дека денеска и официјално се потпишaни договорите за изградба на електраната.

Од опозициската партија посочуваат дека од првичните најави минало многу време, а, како што велат, ниту фотонапонска централа има, ниту се произведени првите мегават часови електрична енергија.

„Денес Зоран Заев повторно промовирајќи еден ист проект, не кажа ни збор за над 450 вработени во рудникот на РЕК Осломеј, дали и каде воопшто ќе работат овие луѓе. Тоа само говори за површноста во пристапот на оваа влада по вака сериозни енергетски и социјални прашања“, се наведува во партиската реакција.

Од ВМРО-ДПМНЕ посочуваат дека во ситуација на пад на рејтингот и како што велат, секојдневни корупциски скандали, Заев е спремен да ветува и рециклира стари ветувања за да ја дефокусира јавноста од своите неуспеси.

Костадин Костадинов и СДСМ продолжуваат слепо да го следат Зоран Заев во распродавањето на националните интереси, реагираат од ВМРО-ДПМНЕ, откако портпаролот на владејачката партија денеска обвини дека ВМРО-ДПМНЕ и Мицкоски целосно се загубиле во деструктивноста.

Од опозициската партија прашуваат зошто СДСМ и двоецот Заев – Бучковски молчи и на одговара дали во преговорите со Бугарија е ставена бугарската декларација како основа на новиот анекс.

„Зошто бегаат од одговорот дали историскиот континуитет на македонскиот јазик и народ се дел од преговорите со Бугарија? Дали подготвуваат ретуширање на историјата, газење на антифашистичката борба на македонскиот народ и асномските идеали врз кои е градена Македонија?“, прашуваат од ВМРО-ДПМНЕ.

Според оваа партија, Заев е подготвен на секакви концесии и отстапки за да ја зачува власта бидејќи, како што велат, се чувствува заштитен од одговорност за својот криминал.