Соопштенија
(Видео) Димовски: Невенка Стаменковска е кадар на Груевски, нејзината неспособност не може да се прикрие
Сите кадри на ВМРО-ДПМНЕ во Владата се производ на криминалниот режим на ВМРО-ДПМНЕ и Груевски. Затоа не чуди нивната режимска, насилничка матрица, која сè уште е силно присутна во ВМРО-ДПМНЕ. Особено не треба да нè чуди и продолжувањето со лажењето на македонската јавност и нудењето постојано и постојано лажни информации и бројки. Со таква понуда Христијан Мицкоски и ВМРО-ДПМНЕ ќе доживеат силен, убедлив пораз на предвремените избори, соопшти Методија Димовски, член на Комисијата за информатичко општество и администрација на СДСМ.
„Граѓаните треба да знаат дека вистинските бројки за вработувањата не се тие кои ги соопштува гламурозната дополнителна заменик-министерка за информатичко општество и администрација, Невенка Стаменковска.
Вистината е следната. Како и секогаш, ние сме отворени и транспарентни, па ќе ги соопштиме и бројот на вработени на неопределено и оние на определено време. Ова во време на владеењето на ВМРО-ДПМНЕ беше државна тајна. Според податоците на Агенцијата за вработување на Република Северна Македонија, во месеците ноември и декември 2019 година бројот на вработени на определено и неопределено време, на кои им престанал работниот однос, изнесува 6.460, а во исто време бројот на вработени кои засновале работен однос, изнесува 6.015. Ова значи дека вкупниот број на вработени во јавниот сектор е намален за 445 лица. За разлика од ВМРО-ДПМНЕ ние го кажуваме изворот на информации, тој е јавно достапен и јавноста може лесно да се увери во лагите и паушалните изјави на партиските војници на ВМРО-ДПМНЕ.
Но, ајде малку да направиме една длабинска анализа и споредба, која исто така е факт. Во периодот 2009—2015 година режимот на Груевски и ВМРО-ДПМНЕ вработувал во просек годишно по 1.671 државен, односно административен службеник само во органите на централната и локалната власт. За споредба, во периодот 2017—2019 година Владата на СДСМ, работејќи според законите и правилата кои ги донесе Владата на ДПМНЕ, преку Агенцијата за администрација вработувала просечно годишно само 1.098 административни службеници или за повеќе од 35% помалку отколку во времето на режимот.
Почитувани граѓани, Невенка Стаменковска е кадар на Никола Груевски, кој едно мисли, друго зборува, а трето прави. Затоа, во првиот нејзин настап како гламурозна заменик-министерка зборува дека сакала „конечно да дојдат квалитетни кадри кои се обучени и треба да ја водат Македонија напред кон Европската Унија“. При тоа заборава да спомене дека само пред две недели нејзината партија изрази жестока спротивставеност за предлогот за новиот Закон за висока раководна служба, предложен од Владата предводена од СДСМ.
Тоа е закон што е изработен во соработка со СИГМА и е поддржан од страна на ЕУ, а негова цел е целосна деполитизацијата и професионализација на високите позиции во администрацијата, бидејќи предвидува високите раководители, односно извршните секретари и извршните директори да бидат избирани низ целосно јавен и транспарентен процес, а потоа постојано стручно да се усовршуваат и развиваат, заради успешно остварување на институционалните цели и работни задачи.
ВМРО-ДПМНЕ нема програма, нема план, не знае што со јавната администрација, нема предлог, нема ништо. ВМРО-ДПМНЕ јавно ни порачува дека не се промениле и дека сакаат да продолжат со бруталната партизација од времето на заробената држава на Груевски.
Затоа, почитувани граѓани, СДСМ е убеден и верува дека на 12 април вие, граѓаните, уште еднаш ќе ја поразите насилничката и манипулаторска матрица на ВМРО-ДПМНЕ и ќе им порачате — РЕЖИМ НИКОГАШ ПОВЕЌЕ“, истакна Димовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Соопштенија
„Еуромакс ресурсес“ со последно предупредување пред арбитража за рудникот за бакар „Иловица-Штука“
„Еуромакс ресурсес“, компанија сопственик на концесиите „Иловица 6“ и „Иловица 11“ за рудникот за бакар „Иловица-Штука“, денеска на прес-конференција издаде последно предупредување пред арбитражата.
Од компанијата истакнаа дека од своето основање во 2004 година, проектот Иловица-Штука симболизира светилник на можности, отелотворувајќи ја цврстата посветеност на „Еуромакс ресурсес“ за одговорен развој и економски просперитет. Сепак, и покрај значителните инвестиции и во финансиските и во човечките ресурси, проектот се наоѓа себеси заробен во мрежа од правни и административни пречки.
Третманот на проектот од страна на властите е скандалозен, цени „Еуромакс ресурсес“. Менаџментот на компанија истакна дека и покрај јасните правни победи, бирократската инерција и произволните одлуки постојано го попречуваат напредокот. Овие одложувања не само што ја нагризуваат довербата во регулаторното опкружување, туку и ја загрозуваат егзистенцијата на илјадници кои ќе имаат корист од проектот и ги одвраќаат идните странски инвестиции во Македонија.
„За да не бидеме погрешно протолкувани, сакаме да бидеме јасни и прецизни. Нашето трпение е при крај. Не можеме повеќе да одолговлекуваме, чекајќи политички одлуки за/игнорирање на правните околности. Ако политиката – спротивно на законот – каже „не“ за нов и модерен рудник за бакар, има правен епилог кој нема да биде поволен за државата, а за жал и нејзините граѓани. Меѓународната арбитража не е одлука што ја земаме лесно. Тоа има значителна цена – и во однос на ресурсите и угледот на нашата компанија и на земјата. Сепак, во услови на континуирано малтретирање и флагрантно непочитување на владеењето на правото, тоа е чекор што сме подготвени да го преземеме за да ги заштитиме нашите и интересите на нашите инвеститори“, истакна претседавачот на Бордот на директори и главен извршен директор на „Еуромакс ресурсес“, Тимоти Морган Вин.
На прес-конференцијата свое обраќање имаше и Габриел Лански, од адвокатската куќа Lansky, Ganzger, Goeth & Partner, која е правен застапник на „Еуромакс ресурсес“. Тој истакна дека „Еуромакс ресурсес“ има доставено формално известување за спор (тригер-писмо) до Владата во март 2020 година, за настанатиот спор и нивната намера да влезат во меѓусебни консултации за решавање на спорот и дека.
„Повеќе од очигледно е дека Владата на Северна Македонија не ги исполни обврските да се консултира и соодветно да преговара со член 10(1) од Договорот Швајцарија – Северна Македонија и со тешко срце сега размислуваме да го пренесеме нашиот случај пред меѓународната арбитража. Оваа одлука доаѓа по исцрпните напори за решавање на нашите спорови во локалната рамка, а сето тоа доведе до овој ќорсокак каде финансиските последици би можеле да бидат страшни за и онака кревката економија на Северна Македонија. Владата вака постапува иако Северна Македонија е во процес на обид да влезе во Европската Унија како земја членка. Пред да заклучам, поставувам едно неодложно прашање до владата и народот на Северна Македонија: Дали оваа средина на правна непредвидливост ќе се прошири и на други инвеститори или е предизвик единствено насочен кон ‘Еуромакс ресурсес’? Ресурсот што сакаме да го развиеме е национално богатство и неминовно ќе треба да го искористиме, ако не ние тогаш некој друг. Изборите направени денес ќе резонираат надвор од нашиот проект, обликувајќи го економскиот пејзаж на земјата и нејзината меѓународна репутација во годините што доаѓаат “, истакна Лански.
„Еуромакс ресурсес“ ги повика надлежните државни институции да ги исполнат своите законски обврски, да го почитуваат владеењето на правото и да се вклучат во напорите со добра волја за да се забрза решението. Компанијата останува посветена на соработка со владата, заедниците и пошироките засегнати страни за да испорача трансформативен проект, кој е повеќе од потребен на повеќе нивоа.
„Еуромакс ресурсес“ ја потврди својата непоколеблива посветеност за одговорен развој, просперитет на заедницата и успехот на проектот „Иловица – Штука“ со највисоко ниво на почитување на најсовремените стандарди за заштита на животната средина преку примена на најсовремени технологии во рударската индустрија. Меѓутоа, ако тековниот третман на проектот од страна на властите продолжи, и ако владеењето на правото продолжи да се занемарува, тогаш арбитражата ќе стане неизбежна реалност.
ПР текст
Соопштенија
Нова акција на „Спорт лајф“ – „Кој е твојот среќен тип?“
Во обложувалниците на „Sport Life“, во тек е акцијата „Кој е твојот среќен тип?“. Среќната игра ќе им донесе на обложувачите на Sport Life, многу „седумки“: главна премија од 777.000 денари и по 7 (седум) вредносни ваучери од 500 денари за секој од победниците во поединечните етапи на акцијата.
Среќата треба да ја бараат во онаа игра со која ќе успеат да погодат тикет со најголем број натпревари со исто типување. Соодветно на тоа, играчите ќе се рангираат и на генерално ниво, до крајот на играта, и на седумдневно – етапно ниво.
Акцијата се однесува само за несистемските тикети, со погодени минимум шест натпревари со ист тип, со минимална квота од 1,50 по пар. Исто така, во пресметката за бодување и рангирање на тикетот влегуваат и натпреварите од понудата „Супер тип“ и натпреварите од понудата за обложување во живо.
Акцијата ќе трае до 25-ти април и важи за членовите на СЛ клубот со приложување на СЛ клуб картичката.
Сите информации за играта и тековното рангирање за генералниот и етапен пласман се објавени на вебстраницата на Sport Life и на официјалните канали на социјалните мрежи.
ПР текст
Соопштенија
Праизведба на претставата „Хенгинг Араунд“
Во Македонскиот народен театар, на 19 април, со почеток во 20 часот, ќе се одржи праизведбата на претставата „Хенгинг Араунд“ во режија и адаптација на Бојан Трифуновски, по текст на Љупчо Јованов.
Главните ликови 0 (Хенгинг) и 1 (Араунд) во оваа приказна се изгубени во светот на бајките и не се знае како влегле во овој свет, но главна цел им е да се вратат во реалноста, во нивните топли огништа. Можеби се Дисмас и Гестас, но пред да ги распнат можеби некако им избегале на Римјаните и продолжиле да го живеат својот динамичен живот, овој пат празен и лишен од средба со Спасителот. Можеби патем решиле да се смират, да создадат семејство со единствена цел – да умрат во длабока старост почитувани од пријателите и саканите и жалени од најблиските. Дали нивниот карактер, судбина, ги натерала повторно да си ја пробаат среќата и да почнат нова авантура, да влезат во нова приказна…
Целото дејство се случува во светот на бајките, а местото и времето се ирелевантни.
Во претставата играат: Сашко Коцев, Александар Михајловски, Стефан Спасов, Гораст Цветковски, Борче Начев, Ана Стојановска, Софија Насевска-Трифуновска и Нела Павловска.