Третиот пакет економски мерки ќе ги заживее домашните економски дејности, ќе ги трансформира и модернизира со цел да се создадат услови за динамичен раст и нова развојна македонска економија. Новите економски мерки се системски решенија и нудат директна финансиска поддршка за зголемување на потрошувачката, поддршка на стопанството, земјоделството и туризмот, но и награда за најизложените здравствени работници во знак на благодарност за нивната работа, соопшти СДСМ.

Според партијата, во првиот столб од третиот сет мерки е предвидено воведување платежни картички вредни 9.000 денари за речиси 100 илјади граѓани. Со оваа поддршка ќе се стимулира понудата на домашни производи и услуги со директна парична поддршка од државата преку потрошувачката на граѓаните.

Корисници на платежната картичка може да бидат невработени лица, баратели на работа, кои немаат над 15.000 денари месечни приходи, како и примателите на гарантирана минимална помош. Вредноста на оваа мерка е 16 милиони евра.
Новиот економски пакет е насочен и кон активирање на домашниот туризам преку ваучер во износ од 6.000 денари за користење во домашните сместувачки капацитети, а граѓаните ќе добијат и платежна картичка од 3.000 денари за купување домашни производи и услуги.

Со оваа мерка се опфатени сите вработени граѓани што примаат нето-плата помала од 15.000 денари месечно и немаат други приходи. Тоа значи дека, без разлика на месечните примања на едно домаќинство, членовите од семејството што имаат лични примања под 15.000 денари месечно може да бидат корисници на домашниот туристички ваучер и платежната картичка. Вредноста на оваа мерка е 16 милиони евра. Во фокусот на третиот пакет економски мерки се и младите за кои се предвидени три мерки: парична поддршка за млади дo 6.000 денари за покривање партиципација на универзитет или за сместување во студентски и ученички домови и во регистрирани сместувачки капацитети и кои доаѓаат од семејства со ниски приходи. Платежна домашна картичка од 3. 000 денари за домашни производи и услуги и ваучери до 30.000 за кофинансирање обуки за ИТ и дигитални вештини, со цел да бидат конкуренти на пазарот на труд. Вредноста на овие мерки за млади се речиси 12 милиони евра и и опфаќа 100.000 млади.

„Во име на посветеноста на здравствените работници, кои се бореа во првите редови во битката со Ковид-19 и во знак на благодарност, Владата предводена од СДСМ ќе ги награди докторите и медицинскиот персонал на инфективните клиники и одделенија, на Универзитетската клиниката за инфективни болести и фебрилни состојби, На Институтот за јавно здравје и во центрите за јавно здравје, како и сите членови на тимовите од итната медицинска помош, и тоа со 20 отсто повисока плата за два месеца, која ќе биде исплатена преку домашна платежна картичка.

Економските мерки, кои се со цел да ја заздрават и заживеаат македонската економија, предвидуваат и викенд без ДДВ за сите граѓани што преку поевтини цени, ќе поттикнат потрошувачка и раст на приходи во домашните производствени и продажни капацитети, како што се продавниците за гардероба, бела техника, мебел, санитарија, школски прибор и книги. На овој начин граѓаните ќе добијат поголем поврат на ДДВ од сегашниот модел и преку постојното софтверското решение „Мој ДДВ“. Се очекува преку оваа мерка 20 милиони евра да се слеат назад во стопанството. Вториот столб од овој сет мерки нуди директна поддршка на македонското стопанство – иновативност и развој за зачувување на постојните и за нови работни места. Преку бескаматните кредитни линии за сите микро и мали компании, во вредност од 31 милион евра, преку Развојната банка на Северна Македонија, обезбедени се 30 отсто грант како поддршка за жените, младите, фирми што воведуваат дигитализацијата во бизнисот или, пак, се извозно ориентирани. Ќе се инвестираат нови 1,6 милион евра за развој на иновативни продукти и услуги преку ФИТР преку мерката поддршка за развој на домашни стартап-продукти и услуги.

Со третиот столб од овој сет мерки е предвидена и поддршка за земјоделците. Аграрниот сектор ќе биде поддржан со 5 милиони евра преку Развојната банка. По ланското субвенционирање од 30 отсто за зелена нафта, преку платежната картичка за субвенционирање зелена нафта за земјоделците, субвенцијата ќе се зголеми на 50 отсто. Оваа мерка ќе опфати 50.000 земјоделци, а вредноста е 4,6 милиони евра. Вредноста на новиот трет сет економски мерки изнесува 355 милиони евра и со него ќе бидат опфатени 730.000 корисници. Вкупниот влог во новата развојна македонска економија, трите пакет-мерки изнесуваат 550 милиони евра или од 5 до 5,5 отсто од БДП. Со ефектите од економските мерки од првите два пакета се создаваат услови за динамичен раст и нова развојна македонска економија“, се додава во соопштението.