За првпат во историјата, наш министер за одбрана седна на масата на Алијансата. Министерката Радмила Шекеринска учествуваше на состанокот на министри за одбрана на Северноатлантскиот совет на НАТО, рамо до рамо со колегите од земјите членки на Алијансата, соопшти СДСМ.

,,Зад нас се годините кога земјава тонеше во изолација, поделби, економско уназадување и неизвесност. Република Северна Македонија конечно е дел од НАТО сојузот, учесник во процесите за глобална безбедност.Граѓаните се горди на историскиот успех, ние сме НАТО.

Во меѓувреме, започна и ратификацијата на Протоколот за пристапување на Република Северна Македонија во НАТО во парлеманетите на државите членки на НАТО.  Протоколот веќе е ратификуван од парламентите на Република Грција, Словенија и Република Албанија, а во наредниот период се очекува ратификација и од парламентите на други земји членки.Република Северна Македонија го добива своето заслужено место во НАТО и станува 30 земја членка на Алијансата, што значи безбедност, сигурност и стабилност, но и економски раст, повеќе инвестиции и повеќе пари за граѓаните”, се додава во соопштението.

,,Пред две години лажгото Заев прашуваше ,,Зарем ние ќе и кажеме на Америка дека згрешила што не признала под уставното име”. Пред година дена лажгото Заев ветуваше дека нема да дозволи Македонија да биде обесчестена и да се менува натписот на влезот во владата.
Овие денови гледаме дека човекот штом ќе зине, лаже”, се вели во соопштението на ВМРО-ДПМНЕ.

Според партијата, Заев ги извести САД дека згрешиле што не признале под уставното име. Заев ја обесчести Македонија симнувајќи го написот на влезот во Владата. Се менуваат таблите на граничните премини и целосно се брише институционалниот идентитет. Имињата ги менуваат и Народната банка и министерствата.

,,Заев ги продаде највисоките национални интереси. Во државата владее целосен хаос. Се вработуваат само деца, брачни партнери и роднини на послушниците на Заев. Непотизмот и корупцијата го достигнуваат максимумот. Парите на граѓаните се ограбуваат безмилосно преку сомнителни набавки и тендери. Власта се луксузира, а народот осиромашува.Граѓаните и државата ја плаќаат цената на лагите на Зоран Заев. Ова уништување на државата мора да запре, а првиот чекор се претстојните претседателски избори”, соопшти партијата.

Сите вработувања се согласно планот, програмата на самата институција и за сите кандидати важат еднакви услови и критериуми, велат од СДСМ и се повикуваат на Државната комисија за спречување на корупцијата, која порача дека ќе направи анализа и ќе го испита целиот процес на вработувањата во јавниот сектор на лица блиски до одредени функционери.

Јавноста навремено ќе биде информирана за исходот на постапката, додаваат од владејачката партија од каде порачуваат дека се доследни на ставот оти во државната администрација нема и не смее да има реваншизми, притисоци и политика.

Како реакција на обвинувањата на Димче Арсовски од ВМРО-ДПМНЕ дека синот на пратеничката Ѓорѓиева е вработен во МВР со средно образование, од СДСМ велат дека доколку отворено се зборува за непотизам, тогаш опозициската партија треба да се запраша како нејзиниот претседател Христијан Мицкоски на Машински факултет станал асистент токму кај татко му.

„Нека го прашаат Мицкоски и за тоа како и зошто токму тој добил бизнис со хидроцентралите од Владата во која бил ангажиран како советник на неговиот Никола Груевски“, порачуваат од владејачката партија.

Истакнуваат и дека секој има право да членува или да не членува во политичка партија, но тоа право никако не смее да се доведе во врска со работното место, објаснивајќи дека започнат е процес на деполитизирана и департизирана администрација.