Швајцарија стигна до навистина импресивна 5:2 победа над Белгија за да го обезбеди првото место во групата 2 од Лига А во Лигата на нации на УЕФА и да стигне до место во завршницата на натпреварувањето, откако губеа со 2:0 по само 17 минути игра.

Фудбалерот на Борусија Менхенгладбах и брат на ѕвездата на Челси Еден, Торген Азар постигна два гола во 2. и 17. минута за на третопласираната репрезентација од СП во Русија да и донесе водство од 0:2 во Луцерн, најавувајќи лесен пласман на „ѓаволите“.

Меѓутоа, домаќините не мислеа така и до крајот на полувремето направија пресврт. Прво Роберто Родригез од пенал намали на 1:2 во 26. минута, по што Харис Сеферовиќ постигна два гола за целосен пресврт. Младиот Нико Елведи во 62. минута зголеми на 4:2, пред Сеферовиќ да го комплетира хет-трикот во 82. минута.

Со оваа убедлива победа, Швајцарија и Белгија имаат по 9 поени во групата 2, меѓутоа Швајцарија има подобар меѓусебен скор (во Белгија загубија со 1:2) и подобра гол-разлика. Исланд испаѓа во Лига Б.

Освен Швајцарија, во „фајнал фор“ се пласираа и Англичаните, како и Португалците, додека четвртиот член ќе се дознае утре – Холандија гостува на Германија со потреба да не загуби за да го претекне светскиот шампион Франција на првото место во групата 1.

Во Лига Ц, Финска загуби со 2:0 на гостувањето кај Унгарија, но сепак од следната сезона ќе настапува во Лига Б, откако Грција доживеа шокантен домашен пораз од Естонија од 0:1.

Фото: ЕПА

ЛИГА НА НАЦИИ, 7.КОЛО

ЛИГА А, ГРУПА 2

Швајцарија – Белгија 5:2

Табела: Швајцарија 9, Белгија 9, Исланд 0

ЛИГА Б, ГРУПА 3

Северна Ирска – Австрија 1:2

Табела: БиХ 10, Австрија 7, С.Ирска 0

ЛИГА Ц, ГРУПА 2

Грција – Естонија 0:1

Унгарија – Финска 2:0

Табела: Финска 12, Унгарија 10, Грција 9, Естонија 4

ЛИГА Д, ГРУПА 2

Молдавија – Луксембург 1:1

Сан Марино – Белорусија 0:2

Табела: Белорусија 14, Луксембург 12, Молдавија 9, Сан Марино 0

Александер Зверев стигна до својата најголема победа во кариерата, откако го совлада светскиот рекет број 1, Новак Ѓоковиќ со 6:4/6:3 во финалето на АТП финалето во Лондон, сопирајќи ја победничката низа на Србинот и во исто време покажувајќи дека неговото време само што доаѓа.

21-годишниот Германец со руско потекло веќе неколку сезони го сметаат за најталентираниот млад тенисер, но до овој трофеј на големите турнири немаше големи остварувања.

Против Ѓоковиќ во преполната „О2 арена“ тој го одигра својот најдобар тенис, упатувајќи невозможни удари од стартот до финишот на мечот за уште еден голем „скалп“ откако претходно го победи и Роџер Федерер во полуфиналето. Сега следната сезона следува „лов“ на гренд слем трофеи.

Со доминантната победа, Зверев станува само третиот Германец со титула на завршниот турнир по Борис Бекер (1988, 1992, 1995) и Михаел Штих (1993).

Ѓоковиќ, пак, и покрај овој пораз не може да биде незадоволен од 2018 година, во која се врати на врвот на светскиот тенис кога многумина го имаа отпишано, освојувајќи две гренд слем титули и заменувајќи го Рафаел Надал на првото место на АТП листата.

„Не можам да опишам што чувствувам. Ова е најголемата титула во мојата кариера и тоа против човекот кој речиси не загуби цела година. Сакам да споменам колку добра личност е тој и колку често разговараме со него, не само за тенисот. Нема да кажам што зборувавме денеска“, изјави Зверев, кој добива околу 2 милиони долари за трофејот.

Фото: ЕПА

Нант ниту во домашниот реванш не успеа да го победи Мотор Запорожје, откако загуби на домашен терен со 23:27 во меч во кој македонскиот капитен даде пет гола. Со овој пораз, Нант си ги влоши шансите за пласман на Фајнал фор и во моментов е на третото место во групата Б со 7 поени, 5 помалку од лидерот Пари Сен-Жермен.

Една недела откако на гости одиграа 30:30 против Мотор, во Нант домашниот тим имаше предност на полувреме (13:12), пред во клучните моменти гостите да направат предност која не ја пропуштија. Никола Клер беше најефикасен за Нант со шест гола, Лазаров имаше пет (од кои два од пенал), додека за гостите Литванецот Аиденас Маласинскас беше во фантастична форма со осум гола.

Слатка одмазда пак имаа во тимот на Целје, откако со 30:21 го „прегазија“ ППД Загреб праќајќи го клубот на Лино Червар на последното место во групата А. Сегед дозволи Скјерн да извлече реми (33:33) во Унгарија, додека Татран Прешов стигна до драматична 29:30 победа на гостувањето во Данска кај Бјеринбро/Силкеборг.

ЛИГА НА ШАМПИОНИ, 7.КОЛО

Бјерингбро/Силкеборг – Татран Прешов 29:30 (17:14)

Целје – ППД Загреб 30:21 (10:9)

Нант – Мотор Запорожје 23:27 (13:12)

Пик Сегед – Скјерн  33:33 (14:15)