Барселона извлече тешко 2:2 реми против каталонскиот ривал Џирона во последниот меч од петтото коло во Ла лига, по што останува на врвот на табелата со 13 поени, но сега исто толку има и Реал Мадрид.

А сѐ започна како под сценарио на „Ноу Камп“. Артуро Видал го пронајде Лео Меси во шестнаесетникот во 19. минута и на Аргентинецот не му беше тешко да го совлада противничкиот голман.

Меѓутоа, клучниот момент се случи во 35. минута кога Ленгле доби црвен картон поради суров старт над ривалот, и Барса до крајот на натпреварот беше со играч помалку. Ова го искористи Кристијан Стуани, кој во 45. минута израмни на 1:1, а во 51. минута го замолче „Ноу Камп“ со втор гол за водство на малиот тим.

Поен за Барса спаси ветеранот Жерард Пике во 63. минута откако по акцијата на Лео Меси и Артуро Видал, топката дојде до неговата глава.

Фото: ЕПА

Кристијано Роналдо ги надмина фрустрациите од контроверзниот црвен картон против Валенсија во текот на неделата, за да биде човек на одлука на гостувањето на „старата дама“ кај Фросиноне и со гол во финишот на мечот обезбеди продолжување на стоотстотната успешност на шампионот по шест кола. Бернардески во финишот на натпреварот стави печат на победата.

„Бјанконерите“ стартуваа со Кристијано Роналдо и Пауло Дибала, но без суспендираниот Даглас Коста, и се очекуваше дека Фросиноне ќе биде „лесен залак“, посебно бидејќи загубија со 4:0 од Аталанта и 5:0 од Сампдорија.

Роналдо имаше совршена шанса по само седум минути, но Марко Спортиело го спаси голот во последен момент. Но, Јуве остана исфрустриран сѐ до 82. минута, кога по една мешаница пред домашниот гол, топката дојде до Португалецот, кој од десетина метри без мака го совлада голманот Спортиело. Ова е трет гол во Серија А за португалскиот ас.

Фернандо Бернардески во 94. минута стави точка на натпреварот, откако Роналдо поведе еден брз контранапад и на Бернардески не му беше тешко да ја потврди победата.

Фото: ЕПА

Фантастичен натпревар се одигра во Пула, каде што Хајдук со 4:2 ја совлада Истра благодарение на двата гола на македонскиот репрезентативец Мирко Ивановски, и најави излегување од кризата која трае подолго време.

Хајдук под водство на новиот тренер Зоран Вулиќ имаше одлично прво полувреме и три гола преку Адам Ѓурчо (20. и 25. минута) и Ивановски (36. минута). Истра врати преку панамскиот репрезентативец Х.Л. Родригез, кој постигна фантастичен гол за намалување на 3:1.

Mirko Ivanovski after scoring two goals: “Hajduk is waking up before the derby against Dinamo” pic.twitter.com/56bXCSawHJ

— CroatianFootballNews (@CroatianNews) September 23, 2018

Миерез намали на 2:3, пред Ивановски да го постигне одлучувачкиот гол по одлична асистенција на Ѓурчо. Ивановски имаше шанса да го комплетира хет-трикот во 93. минута, но Груевиќ игра со рака и ја вади топката од гол-линијата за што добива црвен картон. Мијо Цакташ ја погодува пречката од белата точка.

Ова е совршена увертира на „билите“ пред големото дерби против Динамо Загреб.