Спорт
Агаси: Ѓоковиќ не ме слушаше и така не може да има соработка
Легендата на американскиот тенис, Андре Агаси во ексклузивно интервју за швајцарскиот „Блик“ вели дека е импресиониран од тоа што Роџер Федерер уште е на АТП турнејата, но дека уште поимпресивна е неговата работа во добротворни цели преку неговата фонд…
Легендата на американскиот тенис, Андре Агаси во ексклузивно интервју за швајцарскиот „Блик“ вели дека е импресиониран од тоа што Роџер Федерер уште е на АТП турнејата, но дека уште поимпресивна е неговата работа во добротворни цели преку неговата фондација.
„Одлично е да се види дека Роџер мисли глобално, а не само за себе. Тоа му оди одлично и добро е што го ценат и за други работи. Се надевам дека Роџер ќе остане уште долго на тенискиот терен, но кога ќе дојде крајот, тој доаѓа бргу. Како што одат годините, времето за физичко опоравување е подолго и потешко и тој мора да биде внимателен со неговите одлуки. Затоа беше умен и не играше во сезоната на земја. Јас играв до 36 години, но тогаш веќе ништо не беше можно физички и телото ми кажа: ’Доста е!’. Други спортови се побрутални од тенисот за телото, но предизвикот во тенисот е уникатен – промена на подлоги, временски услови, различни континенти… Дефинитивно не е лесно“, вели Агаси.
Агаси исто така коментираше за својата кратка „авантура“ како тренер на светскиот број 1, Новак Ѓоковиќ.
„Новак беше благодарен за моите совети, но не веруваше во тоа што го кажував, така што не можев да направам ништо. Искуството да го запознаам беше одлично, но кога чувствуваш дека ќе направиш повеќе штета отколку што ќе помогнеш, нема смисла да остануваш. Немаше вистинска соработка. Се согласивме да не се согласуваме. Неговата лоша физичка подготвеност не помогна и тој не сврза два дена во кои беше здрав“, објаснува Агаси.
Фото: ЕПА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Тонали сега е на удар и на Англичаните поради обложувањето
Играчот од средниот ред на Њукасл, Сандро Тонали е под истрага од Фудбалската асоцијација (ФА) поради прекршување на правилата против обложување.
Италијанецот веќе отслужува 10-месечна суспензија од Италијанскиот фудбалски сојуз поради обложување за време на неговото играње за Милан.
Новите докази покажуваат дека Тонали се обложувал и кога дошол во Њукасл. Младиот 23-годишен играч го прекршил правилото дури 50 пати од 12 август до 12 октомври 2023 година.
На Тонали му е даден рок до 5 април да одговори на обвиненијата.
„Добивме потврда дека е покрената истрага. Клубот и Тонали целосно ќе соработуваат. Тоа е се што можеме да кажеме во моментов“, се вели во соопштението за медиумите на клубот.
Тонали пристигна во Њукасл минатиот јули во трансфер вреден 60 милиони фунти од Милан.
Спорт
Најдобриот судија во БиХ поради закани одби да им суди на Железничар и Сараево
Шампионатот на Босна и Херцеговина влегува во завршна фаза, а локалниот портал „Спортспорт“, пишува дека најдобриот судија, Ирфан Пељто одбил да им суди на клубовите кои доаѓаат од главниот град Железничар и Сараево) до крајот на сезоната.
Пељто тоа го направил поради наводните закани што ги добивал тој и неговото потесно семејство, кои ги пријавил во полиција. Најдобриот судија од БиХ за својата одлука го известил Судискиот комитет на Фудбалскиот сојуз на Босна и Херцеговина, кој ја прифатил неговата одлука.
Железничар и Сараево ќе одиграат неколку дерби натпревари до крајот на сезоната, но Пељто нема да суди на ниту еден од нив.
Тој требаше да биде главен судија викендов на дербито меѓу Железничар и Вележ, но главен судија на „Грбавица“ ќе биде Елведин Топузовиќ. .
Пељто гради завидна кариера на меѓународен план и често суди натпревари во Лигата на шампионите. Неодамна судеше на пријателскиот натпревар меѓу Словенија и Португалија, а претходно го судеше и натпреварот Лајпциг- Реал Мадрид.
Речиси е сигурно дека ќе суди на ЕП.
Спорт
Интер подготвува нов договор за Инзаги
Интер е апсолутен лидер во Серија А, прашање е само кога и математички ќе ја обезбеди шампионската титула, која ќе биде прва во кариерта на Симоне Инзаги. 47-годишниот тренер досега има освојувано трофеи само во Купот и Суперкупот на Италија.
Она што Инзаги го направи оваа сезона во Серија А, ги натера клупските челници да ја сменат својата стратегија и да му понудат нов договор на тренерот.
Инзаги досега двапати го продолжуваше договорот со Интер, во 2022 и 2023 година, двата пати клубот му понуди едногодишен договор. Овој пат на 47-годишниот тренер ќе му биде понуден двегодишен договор.
Во однос на претходните години, разликата е што на Инзаги ќе му биде понуден нов договор пред да заврши сезоната, а не откако таа ќе заврши.
Интер е на чекор до освојување на шампионската титула во Серија А, откако по 29 кола е прв на табелата со 76 бодови, 14 повеќе од второпласираниот градски ривал Милан.