Спорт
Мурињо „откачи“ – 12 минути ги бранеше своите резултати (видео)
Жозе Мурињо имаше неверојатна соло-прес конференција по елиминацијата од Лигата на шампионите од Севилја по 1:2 поразот во средата на „Олд Трафорд“, во која 12 минути зборуваше без престан, бранејќи ги своите резултати.
Португалецот постојано ја повтор…
Жозе Мурињо имаше неверојатна соло прес-конференција по елиминацијата од Лигата на шампионите од Севилја по 1:2 поразот во средата на „Олд Трафорд“, во која 12 минути зборуваше без престан бранејќи ги своите резултати.
Португалецот постојано ја повторуваше фразата „фудбалско наследство“, откако беше остро критикуван за стратегијата и негативниот пристап за дуелот со Севилја. 55-годишниот тренер беше подготвен со белешки и уште еднаш изјави дека неуспехот во Европа „не е ништо ново за клубот“
„На фановите ќе им кажам дека се фанови и дека имаат право на свое мислење и реакции. Но, постои нешто што се нарекува фудбалско наследство. Не знам дали тоа добро се преведува од мојот мајчин португалски јазик. Тоа што менаџерот наследува во клубот. Последен пат Манчестер јунајтед беа во финалето на Лигата на шампионите во 2011 година. Во 2013 на ’Олд Трафорд’ испаднаа во осминафиналето, јас бев на другата клупа. Во 2014, во четврт-финалето, во 2015 без европски фудбал, во 2016 надвор во групната фаза и пласман во Лигата на Европа. Во 2017 ја освоивме Лигата на Европа и се вративме во ЛШ. Во 2018 победивме во групата со 15 од можни 18 поени и загубивме во осминафиналето“, ја анализираше Мурињо европската судбина на „ѓаволите“.
Потоа следуваше и одбраната.
„Кога ќе си заминам, на следниот менаџер на Јунајтед ќе му ги оставам Лукаку, Матиќ и Де Хеа со поинаков менталитет, со поинаков квалитет. Седум години со четири различни менаџери, еднаш не се квалификувавме за Европа, двапати испаднавме по групи и најдоброто беше четврт-финалето. Тоа е фудбалското наследство. Ако сакате можеме да гледаме и кон Премиер лигата – последна титула во 2012/13 и четири сезони во кои сме седми, четврти, петти и шести. Во последните четири години четвртото место ни е најдобро. Тоа е фудбалското наследство. Значи дека процесот не почнува со мене. Фановите секогаш ќе ги почитувам, посебно тие кои го познаваат фудбалот“, вели Мурињо.
Јунајтед викендов играат четврт-финале од ФА купот против Брајтон, но за мечот не се зборуваше многу на прес-конференцијата. Мурињо ги отфрли шпекулациите дека е подготвен да замине, велејќи дека има одговорност кон клубот.
„Би можел да бидам во друга земја со титулата в џеб, но не го сакам тоа. Тука сум и нема да го сменам менталитетот. На португалски има една изрека – секој ѕид е врата. Нема да бегам, нема да исчезнам. Нема да плачам бидејќи ме свиркаат. Следниот меч прв ќе бидам на теренот и не се плашам од ништо“, ја заврши Мурињо неверојатната прес-конференција.
Фото: ЕПА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Куртоа се враќа до крајот на сезоната
Tренерот на Реал, Карло Анчелоти денеска изјави дека голманот Тибо Куртоа треба да се врати во тренажен процес за десет дена, пренесуваат шпанските медиуми.
На 20 март Куртоа беше опериран поради скинат менискус на десното колено. Шпанските медиуми потсетуваат дека белгискиот голман требаше да паузира до крајот на сезоната, но Анчелоти тврди дека Куртоа успешно се опоравува.
„Куртоа добро закрепнува, би можел да биде во тимот против Кадиз“, изјави Анчелоти.
Шпанските медиуми пренесуваат дека Куртоа сигурно ќе го пропушти натпреварот против Реал Сосиедад во Ла Лига, како и првиот полуфинален натпревар од Лигата на шампионите против Баерн.
Натпреварот од 34. коло во шпанското првенство помеѓу Реал и Кадиз ќе се одигра на четврти мај во Мадрид.
Спорт
Евролигата нема да го толерира однесувањето на Атаман
Кошаркарската Евролигата се огласи по бурната реакција и изјава на Ергин Атаман по поразот на Панатинаикос од Макаби, во Атина на стартот од четвртфиналната серија.
Во соопштението на веб-страницата на елитното натпреварување, се нагласува дека е недозволиво Атаман да ги етикетира судиите, дека таков приситсок нема да биде толериран и дека е покрената дисциплинска постапка против тренерот на Панатинаикос.
За потсетување, Атаман веднаш по натпреварот потенцираше дека судиите му доделиле шест поени на Балдивин, бидејќи досудиле два непостоечки, смешни фаули при шут за три поени, но во исто време нагласи дека ПАО продолжува понатаму, до завршниот турнир во Берлин.
Атаман на прес-конференцијата отиде чекор понатаму, велејќи дека ќе го напушти Панатинаикос доколку не избори пласман на завршниот турнир.
Макаби води во четвртфиналната серија со 1-0, вториот меч се игра вечерва повторно во Атина, а потоа следуваат два натпревари во Белград – 30 април и 2 мај, а евентуалната мајсторка ќе се игра на 8 мај во Атина.
Спорт
Гвардиола за Жоао Кансело: Ќе видиме на крајот на сезоната
Жоао Кансело е член на Манчестер Сити, а моментално е на позајмица во Барселона до крајот на сезоната. Прашање е дали Барселона сака да го отткупи неговиот договор, откако Португалецот беше означен како еден од главните виновници за елиминацијата од ПСЖ од Лигата на шампионите и поразот од Реал во Ел Класико.
Менаџерот на Манчестер Сити, Пеп Гвардиола изјави дека на крајот на сезоната ќе одлучи дали Кансело ќе се врати во клубот, пренесуваат британските медиуми.
„Се уште не сме разговарале за иднината на Кансело во нашиот клуб. Ќе разговараме на крајот на сезоната“, изјави Гвардиола.
Кансело (29) е член на Манчестер Сити од 2019 година. Тој има договор со англискиот клуб до 30 јуни 2027 година.
Вториот дел од минатата сезона Кансело го мина на позајмица во Баерн, а потоа Манчестер Сити го испрати португалскиот фудбалер на едногодишна позајмица во Барселона.
Кансело оваа сезона одигра 36 натпревари за Барселона и постигна четири гола.