Домашен
ФФМ најави регионалната лига за млади категории
На состанок со клубовите од Првата лига во „Куќа на фудбалот“, координаторот на младинските категории во ФФМ Зоран Стратев ја претстави идејата за формирање регионално натпреварување за млади категории во кое би биле вклучени младински екипи од Македонија, БиХ, Црна Гора, Унгарија, Словенија, Србија и Хрватска.
По првичните разговори во Загреб со претставниците на асоцијациите вклучени во проектот во регионалната младинска лига би се натпреварувале генерациите 2002 година (тимови до 16 години) и 2004 година (екипи до 14 години), а натпреварувањето би започнало веќе во септември годинава.
Зоран Стратев вели дека сите клубови заинтересирани за учество во натпреварувањето детални информации околу форматот и календарот на натпреварување ќе добијат по вториот состанок закажан во Загреб на 30. јануари на кој ќе присуствуваат претставници на седумте федерации.
„Во принцип сите клубови кои беа присутни на состанокот покажаа заинтересираност за учество во регионалното натпреварување. Јасно ни е на сите дека клубовите и младите фудбалери ќе имаат голема корист од одигрувањето меѓународни натпревари со познати и квалитетни екипи од регионот како Партизан, Динамо, Црвена Звезда, Академија Пушкаш, Олимпија, Хајдук, Марибор или Будуќност. За младите играчи искуството кое би го добиле преку натпреварите со силни екипи од регионот е од големо значење за нивниот понатамошен развој. Голем дел од овие тимови се доминантни во домашните првенства, остваруваат победи изразени со голема разлика, а тоа не би било случај во регионалната лига, таму би играле многу понеизвесни и поквалитетни натпревари“, вели Стратев.
Координаторот на младинските категории во ФФМ истакнува дека во регионалната лига би учествувале најдобро пласираните екипи од домашниот шампионат.
„Доколку сѐ се одвива во најдобар ред и според договореното, лигата би стартувала веќе од септември. На претстојниот состанок во Загреб треба да ги дефинираме или изградиме критериумите околу учеството на екипите, но според првичните разговори во лигата би учествувале најорганизираните екипи од регионот, а тоа речиси по правило се најдобро пласираните тимови од домашните првенства“, истакнува Зоран Стратев.
На состанокот во Фудбалската федерација на Македонија беа присутни претставници на Вардар, Работнички, Шкендија, Шкупи, Победа, Брегалница, Силекс, Македонија Ѓ.П./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.