Спорт
Шпанците го посрамотија светскиот вицешампион Хрватска! (видео)
Првиот официјален меч како светски вице-шампиони не помина најдобро за Хрватска, откако „коцкестите“ беа понижени во Елче од расположената Шпанија, која стигна до неверојатна 6:0 победа.
Луис Енрике совршено го подготви својот тим кој сака да го врати …
Првиот официјален меч како светски вицешампиони не помина најдобро за Хрватска, откако „коцкестите“ беа понижени во Елче од расположената Шпанија, која стигна до неверојатна 6:0 победа.
Луис Енрике совршено го подготви својот тим кој сака да го врати статусот на неприкосновен на европскиот континент, и ако имаше сомнеж по 2:1 победата над Англија на „Вембли“, сега е јасно – „фуријата“ се врати!
Иронично, Хрватите подобро го отворија мечот, и имаа одлични шанси прво преку Ракитиќ, а потоа и преку Перишиќ, но малерот сакаше да го загубат Шиме Врсаљко за повреда веќе во 20-тата минута.
Тогаш на сцена стапија Шпанците. Во 24. минута, Карвахал одлично го најде Саул, кој со глава не му даде шанса на голманот Калиниќ. Во 33. минута веќе 2:0 – Марко Асенсио постигна добар гол од 20 метри, а во 36. минута, Асенсио повторно го матира Калиниќ за целосен распад на „коцкестите“.
Наместо да се соземат по полувремето, Хрватите почнаа уште полошо – Родриго во 50. минута го помина Вида и му даде гол на Калиниќ меѓу нозе, а во 57. минута, Иско од корнер го наоѓа Рамос за високи 5:0. Асенсио повторно беше во форма кога во 70. минута го најде Иско во шестнаесетникот, кој безмилосно од свртување постигнува гол за 6:0.
Во другите мечеви, кои беа во сенка на ова „газење“, Белгија за две минути го „реши“ незгодниот Исланд со 3:0 победа благодарение на Еден Азар и Ромелу Лукаку, додека Босна и Херцеговина со голот на Един Џеко стигна до важна 1:0 победа над Австрија во меч од Лига Б.
ЛИГА НА НАЦИИ
ЛИГА А
Шпанија – Хрватска 6:0
Исланд – Белгија 0:3
ЛИГА Б
Босна и Херцеговина – Австрија 1:0
ЛИГА Ц
Финска – Естонија 1:0
Унгарија – Грција 2:1
ЛИГА Д
Молдавија – Белорусија 0:0
Сан Марино – Луксембург 0:3
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Куртоа се враќа до крајот на сезоната
Tренерот на Реал, Карло Анчелоти денеска изјави дека голманот Тибо Куртоа треба да се врати во тренажен процес за десет дена, пренесуваат шпанските медиуми.
На 20 март Куртоа беше опериран поради скинат менискус на десното колено. Шпанските медиуми потсетуваат дека белгискиот голман требаше да паузира до крајот на сезоната, но Анчелоти тврди дека Куртоа успешно се опоравува.
„Куртоа добро закрепнува, би можел да биде во тимот против Кадиз“, изјави Анчелоти.
Шпанските медиуми пренесуваат дека Куртоа сигурно ќе го пропушти натпреварот против Реал Сосиедад во Ла Лига, како и првиот полуфинален натпревар од Лигата на шампионите против Баерн.
Натпреварот од 34. коло во шпанското првенство помеѓу Реал и Кадиз ќе се одигра на четврти мај во Мадрид.
Спорт
Евролигата нема да го толерира однесувањето на Атаман
Кошаркарската Евролигата се огласи по бурната реакција и изјава на Ергин Атаман по поразот на Панатинаикос од Макаби, во Атина на стартот од четвртфиналната серија.
Во соопштението на веб-страницата на елитното натпреварување, се нагласува дека е недозволиво Атаман да ги етикетира судиите, дека таков приситсок нема да биде толериран и дека е покрената дисциплинска постапка против тренерот на Панатинаикос.
За потсетување, Атаман веднаш по натпреварот потенцираше дека судиите му доделиле шест поени на Балдивин, бидејќи досудиле два непостоечки, смешни фаули при шут за три поени, но во исто време нагласи дека ПАО продолжува понатаму, до завршниот турнир во Берлин.
Атаман на прес-конференцијата отиде чекор понатаму, велејќи дека ќе го напушти Панатинаикос доколку не избори пласман на завршниот турнир.
Макаби води во четвртфиналната серија со 1-0, вториот меч се игра вечерва повторно во Атина, а потоа следуваат два натпревари во Белград – 30 април и 2 мај, а евентуалната мајсторка ќе се игра на 8 мај во Атина.
Спорт
Гвардиола за Жоао Кансело: Ќе видиме на крајот на сезоната
Жоао Кансело е член на Манчестер Сити, а моментално е на позајмица во Барселона до крајот на сезоната. Прашање е дали Барселона сака да го отткупи неговиот договор, откако Португалецот беше означен како еден од главните виновници за елиминацијата од ПСЖ од Лигата на шампионите и поразот од Реал во Ел Класико.
Менаџерот на Манчестер Сити, Пеп Гвардиола изјави дека на крајот на сезоната ќе одлучи дали Кансело ќе се врати во клубот, пренесуваат британските медиуми.
„Се уште не сме разговарале за иднината на Кансело во нашиот клуб. Ќе разговараме на крајот на сезоната“, изјави Гвардиола.
Кансело (29) е член на Манчестер Сити од 2019 година. Тој има договор со англискиот клуб до 30 јуни 2027 година.
Вториот дел од минатата сезона Кансело го мина на позајмица во Баерн, а потоа Манчестер Сити го испрати португалскиот фудбалер на едногодишна позајмица во Барселона.
Кансело оваа сезона одигра 36 натпревари за Барселона и постигна четири гола.