Наградите 13 Ноември за најуспешни спортисти денес во ресторанот Ања во Градскиот парк беа доделени од страна на Сојузот на спортови на град Скопје

Наградите за најуспешни спортисти и спортски работници во поединечни категории 13 Ноември и оваа година свечено беа доделени во ресторанот Ања во Скопје. „Спортот во Скопје официјално датира од 1909 година кога и бил одигран фудбалски натпревар помеѓу две екипи од турскиот аскер, но се забележани и натпревари на народни вештини и во 18 век.“ изјави Ѓорѓи Кузмановски претседател на Сојузот на спортови на Град Скопје. Наградата 13 Ноември за најдобар спортист ја освои боксерот Примислав Димовски за освоеното петто место на СП во бокс кое се одржа во Милано. Спортист на посебни достигнувања наградата ја доби Д-р Сашко Кедев, за подвигот искачување на Монт Еверест, и Томи Стефановски за препливувањето на Ла Манш. Сашко Кедев на Сојузот на спортови на Скопје му подари слика од моментот кога се искачи на највисокиот врв на светот Монт Еверест, а која ќе биде врамена во просториите на сојузот.  „Наградата 13 ноември ја добивам по трет пат во мојата кариера но овојпат за посебни достигнувања, за препливувањето на Ла Манш, и секако дека ми значи оваа награда. Навистина е во ред кога гледаш дека некој ги почитува твоите достигнувања, а во спортот тоа се гледа со добивањето на многу награди“ изјави пливачот на маратони Томи Стефаносвки.„Оваа награда ми е втора по ред, но по долги години. Имав доста голема пауза во кариерата и ова навистина дојде како признание и сатисфакција за тоа што јас по толку време се вратив на спортот. Иако сум на залезот на мојата кариера очекувам во наредните 2-3 години да ги постигнам можеби најголемите успеси и резултати во мојата кариера. Ми престои олимписки циклус, но имаме во план да дадеме се од себе и да стигнеме до олимписките игри“, изјави боксерот Примислав Димовски.Наградата 13 Ноември во категоријата тренери ја освоија Руждија Калаш од боксерскиот клуб „Скопје“, Бошко Заборски од областа на каратето .Наградата за особен придонес и развој на спортот ја добија градоначалникот на Скопје Коце Трајановски,и Драган Ѓурчевски директор на Агенцијата за млади и спорт. „Навистина ми е голема чест што, денес за прв пат како градоначалник на Скопје учествувам на една од најстарите свечени спортски манифестации. Градот Скопје и понатаму ќе настојува да го поддржува и поттикнува спортот, спортските активисти, организатори“, изјави градоначалникот Коце Трајановски.  Признанието за особен придонес во спортот го добија Владо Аницинов од асоцијацијата на лекари и победник на интернационалниот трунир на лекари-тенисери, Живко Поповски и претставниците на спалеолошкото друштво “Врело“, за успешната експедиција во 2009 година. Наградата 13 Ноември за професори по физичко воспитување ја добија: Светлана Илиевска професор во ОУ „Владо Тасевски„, Розалија Ангеловска од ОУ „Живко Трајковски“ и Љупчо Станковски професор во „Методиј Метовски- Брицо“. Наградата 13 Ноември спортски работници ја добија Петар Забарзовски, од кајакарскиот клуб „Илинден“, Стефан Поликовски сорабник во областа на ватерполото.