Со уверливи 17 кошеви разлика (81:64) американските кошаркари во финалето од Светското првенство во Турција го победија домаќинот и ја потврдија неприкосновената доминација откако на големите светски турнири настапуваат играчите од најсилната лига на планетава

САД со ова злато се одлепија од тројката репрезентации со по три светски злата – СФРЈ и СССР кои и онака веќе две децении „не се во можност“ да се појават на светските првенства. Ова беше четврта титула за САД, прва по 1994 г. во Канада. Во недела навечер, освен серијата од 8:0 во првата четвртина кога Турција направи три поена разлика (17:14) во ниту еден друг момент сериозно не се приближи до остварувањето на својот голем сон и приредување сензација. Сепак, играчите од НБА, особено овие кои беа испратени и со доза на скепса по откажувањето на најголеми ѕвезди, се пресилни за репрезентациите од остатокот на светот кај кои исто така недостигаа по играч-два од најсилното кошаркарско натпреварување. Во финалето Богдан Тањевиќ, имајќи го најверојатно предвид својот квалитет на клупата ја прифати играта на брзи напади и дозволување отворени шутеви на противникот, надевајќи се дека неговите играчи ќе ја повторат играта од полуфиналето против Србија кога имаа дури четворица играчи со двоцифрен број поени. Единствено кај Турците во првото полувреме добро функционираше зонската одбрана но таа беше доволна само за да се одржува водството на противникот на десет поени.Очигледно со ова не беа задоволни Американците и во првиот дел од третата четвртина додадоа гас правејќи ја долната граница на нивното водство од 15 поени разлика во своја полза по што само со куси интервали Турците успеваа да ја намалат најмногу до 11 поени а се зголемуваше и на и до плус 20. Така што веќе во првите три-четири минути од последната четвртина кошаркарите на САД почнаа да играат на долги напади а Турците без амбиции да ја им одземат топката, така што и преполната сала во Истанбул „Синан Ердем“ во која официјално имаше повторно 15.500 гледачи овојпат само можеше да го поздрави среброто на своите кошаркари кои успешно го искористија домашниот терен. Како и низ целиот турни и во финалето најдобар играч на мечот беше Кевин Дурант со 28 поени, од кои седум тројки од 13 обида, а повторно го следеше Ламар Одом со 15 кошеви и 11 скокови. Кај Турците Хидает Туркоглу со 16 поени и седум сокови беше најдобриот играч и единствен кој во секој поглед на  кошаркарската игра им парираше на противниците, а бледа поддршка имаше во Ерден со 9, и Иљасова и Тaнчери со по 7 поени. Кевин Дурант е прогласен и за МВП – најкорисен играч на Мундобаскетот со просечен учинок од 22,8 кошеви и 6,8 скокови по натпревар.Сега на листата по успешност водат САД со 4 злата, 3 сребра и 4 бронзи (11), втори и трети се распаднатите СФРЈ и СССР со идентичен учинок од по  3 злата, 3 сребра и 2 бронзи (вкупно 8 трофеи), Бразил има 2 златам 2 сребра и 2 бронзи, Србија и Црна Гора 2 злата, Аргентина по едно злато и сребро, Шпанија едно злато, Русија има две сребра, Турција едно сребро како и Грција, Чиле има две бронзи, а Литванија, Хрватска, Филипини и Германија по една бронза.Хронологија на освојувачите на медали Светските кошаркарски првенства:1950 во Аргентина: Аргентина злато, САД сребро, Чиле бронза;1954 во Бразил: САД злато, Бразил сребро, Филипини бронза;1959 во Чиле:  Бразил злато, САД сребро, Чиле бронза; 1963 во Бразил: Бразил злато, СФРЈ сребро, СССР бронза: 1967 во Уругвај: СССР злато, СФРЈ сребро, Бразил бронза; 1970  во СФРЈ: СФРЈ злато, Бразил сребро, СССР бронза;1974  воПорторико: СССР злато, СФРЈ сребро, САД бронза;1978 во Филипини; СФРЈ злато, СССР сребро, Бразил бронза; 1982 во Колумбија: СССР злато,  САД, сребро, СФРЈ бронза;1986 во Шпанија: САД злато, СССР сребро, СФРЈ бронза; 1990 во Аргентина: СФРЈ злато, СССР сребро, САД бронза;1994 во Канада; САД злато, Русија сребро, Хрватска бронза; 1998 во Грција: Југославија (Србија и Црна Гора) злато, Русија сребро, САД бронза;2002 во САД: Србија и Црна Гора злато, Аргентина сребро, Германија бронза;2006 во Јапонија: Шпанија злато, Грција сребро, САД бронза;2010 во Турција: САД злато, Турција сребро, Литванија бронза