Ернесто Валверде можеше да си дозволи да му даде одмор на Лионел Меси пред полуфиналето на Лигата на шампионите со Ливерпул и да го пушти во игра во финишот на мечот, откако Барселона беше пресилна за Алавес и стигна до 2:0 гостинска победа.

По повеќето пропуштени шанси во првото полувреме, 21-годишниот поранешен член на „Ла масија“, Карлес Алења во 55. минута доби убава топка околу пеналтикот и донесе водство за Каталонците. Само пет минути подоцна беше 0:2, откако по ВАР проверката судијата досуди пенал за Барса, кој рутински го реализираше Луис Суарез.

По ова, кога победата беше осигурана, во игра влезе и Меси, кој имаше две убави шанси за гол, но не се запиша во листата на стрелците. Во одредени моменти од натпреварот гостите имаа и речиси 80 отсто од поседот на топката.

Со триумфот Барселона на врвот на табелата има 80 поени, дури 12 поени повеќе од Атлетико Мадрид, кои утре ја пречекуваат Валенсија. До крајот на сезоната, Барса има уште четири, а Атлетико уште пет натпревари.

Тотенхем ја прекина лошата низа на резултати на англиските клубови кои се борат за пласман во Лигата на шампионите, откако Кристијан Ериксен во финишот на мечот успеа да го „пробие“ Брајтон дома за 1:0 победа.

Откако минатите три дена, Тотенхем, Челси, Манчестер јунајтед и Арсенал не успеаја да победат, Спарси не пропуштија уште една шанса да избегаат на конкуренцијата. Сега тие се трети со 70 поени, пред Челси (67 поени), Арсенал (66 поени) и Јунајтед (64 поени). Арсенал и Јунајтед имаат натпревар помалку – тие имаат уште четири меча, додека Челси и Тотенхем уште три.

Поенот, пак, од друга страна можеше да се покаже како клучен за Брајтон за опстанок во лигата – тие се на 17. место со 34 поени, само три пред 18-пласираниот Кардиф, а двата клуба имаат само уште три натпревари за играње. Фулам и Хадерсфилд веќе се испаднати.

И Саутемптон не успеа да дојде поблиску до сигурен опстанок, откако одиграа 1:1 на гостувањето кај Ватфорд. „Светците“ дојдоа до водство со најбрзиот гол во историјата на Премиер лигата – Шејн Лонг ја уфрли топката во голот на домаќините по само 7.69 секунди игра, но Ватфорд израмнија во 90-тата минута со голот на Енди Греј. Саутемптон сега се 16. со 37 поени.

Падна најбрзиот гол во историјата на Премиер лигата (видео)

Шампионите Реал Мадрид во тесен натпревар го победи тимот на Панатинаикос со 89:82 во Грција со за да први да се пласираат на фајнал фор турнирот од Евролигата.

Иако „кралскиот клуб“ имаше подобар старт на мечот, ПАО не се предаваше и ја започна последната четвртина со израмнети 58:58. Во финишот, Реал ја покажа својата сила и сега ќе ја брани титулата од Евролигата на фајнал фор турнирот во Виторија.

Марко Гудуриќ ја презеде одговорноста во третата четвртина за да донесе на Фенербахче 66:57 победа на гости кај Жалгирис за 2:1 водство во нивната серија д плејофот.

Жалгирис имаше подобар старт на мечот и водеше со 34:31 на полувреме, пред Гудуриќ да постигне 11 поени во трета четвртина за пресврт. Сепак, беше тесно и во финишот, на 59:56 на 40 секунди пред крајот, кога Мелих Махмутоглу постигна тројка по која сè беше готово.

Гудуриќ имаше 17 поени, Јан Весели додаде 10, а Костас Слукас 9 поени, додека за Жалгирис Нејт Волтерс имаше 15 поени, а Брендон Дејвис девет.

ЕВРОЛИГА, ПЛЕЈОФ

(1:2) Жалгирис Каунас – Фенербахче 57:66 (19:15, 15:16, 12:18, 11:17)

(0:3) Панатинаикос – Реал Мадрид 82:89 (18:23, 23:13, 17:22, 24:31)