Вечното дерби на Мак-баскетот заврши со победа на МЗТ, „металците“ го победија големиот ривал Работнички со 60:62 ( 13:15, 18:18, 15:19, 14:10).

Ненад Зивчевиќ, поранешниот играч на Работнички му пресуди на својот поранешен клуб, погодувајќи ги клучните слободни фрлања на 17 секунди до крајот на мечот. Зивчевиќ беше најефикасен во редовите на МЗТ со 16 поени на кои придодаде 10 скока и 2 асистенции. Со двоцифрен број на поени во екипата од Аеродром натпреварот го завршија Тони Грнчаров (12 поени, 10 скока) и Кирил Николовски (11 поени, 9 скока).

На спротивната страна тимот од Градски парк го предводеше ветеранот Перо Блажевски со 21 кош и 9 скока, Златко Гоцевски постигна 18 поени од кои 14 во втората четвртина кога не му дозволи на противникот да се одлепи на пристојна разлика.

Дербито двата тима го започнаа многу нервозно, како играчите да беа импресионирани од присуството на 6.000 публика. По почетните 6:6, МЗТ се одлепи на 13:8. Во првиот период „црвено-белите“ имаа очаен шут за три поени, не погодија ниту еден од петте обиди. Втората четвртина повторно подобро ја отворија играчите на МЗТ, стигнаа до највисоката предност од осум поени, но Работнички во игра го врати Гоцевски, во овој период тој постигна 14 од 18-те поени на тимот.

Настаните на ист начин се одвиваа и во вториот дел, МЗТ ја имаше, а Работнички ја бркаше предноста на противникот. Проблемите на екипата од Градски парк се зголемија кога првиот плејмејкер Мираковски влезе во проблеми со личните грешки.

Вистинските возбудувања дојдоа во последната четвртина, Работнички ја отвори фуриозно не дозволувајќи му на противникот да постигне кош речиси пет минути, и негативата од шест поени со серијата од 11:0 ја претвори во позитива од пет коша 57:52.     МЗТ во тие моменти покажа карактер, на серијата на противникот одговори со своја од 6:0, во последните 20 секунди Стефанов израмни на 60:60, Зивчевиќ  ги погоди слободните со кои на МЗТ му ја донесе победата.

„Одлично е да се победи во еден ваков амбиент, но морам да признаам дека немаше да биде незаслужено доколку победата му припаднеше на Работнички. Поголемиот избор на играчи кои ги имав на клупата беше пресуден за конечниот резултат, имав повеќе можност за измени и со пресингот кои го одигравме во одбраната го добивме натпреварот“, изјави веднаш по натпреварот тренерот на МЗТ, Александар Петровиќ.

По овој натпреварот, Работнички и МЗТ се израмнети според учинокот во првенството, двата тима имаат по пет победи и еден пораз, лидер на табелата е Фени Индустри со максимални шест победи. Во следното коло, кое ќе се одигра викендов МЗТ ќе го пречека Пелистер, а Работнички  ќе му гостува на Овче Поле.крај/макфакс/н.ц