Спорт
Кармело Ентони во шутерска форма
Во Пепси центарот во Денвер Кармело Ентони уште еднаш покажа дека е во шутерска форма. Овојпат кошаркарите на Далас немаа одговор за неговата игра, па Денвер славеше само со половина кош разлика (121:120).Денвер одигра подобро на почетокот и во финишот на мечот, а Далас беше солиден во средишницата. Ентони постигна 42 поена при што направи 7 скокови, а Чонси Билапс беше веднаш до него со 30 поени, 5 скокови и 9 асистенции. Во тимот на Далас Џејсон Тери постигна 25 поени, а Тајсон Чендлер 20 поени и 11 скокови.Бостон во својата ТиДи Гарден беше поразен од Лос Анџелес Лејкерс со 86:92. Во домашниот тим Реј Ален беше најефикасен (20 п.) а дабл-дабл постигнаа Ражон Рондо (12 п. 10 ас.) и Кевин Гарнет (10 п. 11 ск.). Коби Брајант беше прва виолина на Лејкерси (23 п. 5 ск. 4 ас.). И во победничкиот тим два играчи постигнаа дабл-дабл, По Гасол (20 п. 10 ск.) и Ламар Одом (10 п. 12 ск.).Тексашаните не беа добри домаќини на Голден Стејт. Во ЈуЕс Еирвејс арената Феникс го победи Голден Стејт со 112:88, ја постигна својата втора едноподруго победа и што е побитно дојде на учинок од 50 проценти (25-25). Стив Неш повторно беше алфа и омега на сонцата. Постигна 18 поени, но како и секогаш беше расположен за асистенции (11). Ченинг Фрај го следеше со 17 поени и 9 скокови. Кај Војниците по 16 поени постигнаа Реџи Вилијамс и Екпе Удох./крај/Макфакс/м.н.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Куртоа се враќа до крајот на сезоната
Tренерот на Реал, Карло Анчелоти денеска изјави дека голманот Тибо Куртоа треба да се врати во тренажен процес за десет дена, пренесуваат шпанските медиуми.
На 20 март Куртоа беше опериран поради скинат менискус на десното колено. Шпанските медиуми потсетуваат дека белгискиот голман требаше да паузира до крајот на сезоната, но Анчелоти тврди дека Куртоа успешно се опоравува.
„Куртоа добро закрепнува, би можел да биде во тимот против Кадиз“, изјави Анчелоти.
Шпанските медиуми пренесуваат дека Куртоа сигурно ќе го пропушти натпреварот против Реал Сосиедад во Ла Лига, како и првиот полуфинален натпревар од Лигата на шампионите против Баерн.
Натпреварот од 34. коло во шпанското првенство помеѓу Реал и Кадиз ќе се одигра на четврти мај во Мадрид.
Спорт
Евролигата нема да го толерира однесувањето на Атаман
Кошаркарската Евролигата се огласи по бурната реакција и изјава на Ергин Атаман по поразот на Панатинаикос од Макаби, во Атина на стартот од четвртфиналната серија.
Во соопштението на веб-страницата на елитното натпреварување, се нагласува дека е недозволиво Атаман да ги етикетира судиите, дека таков приситсок нема да биде толериран и дека е покрената дисциплинска постапка против тренерот на Панатинаикос.
За потсетување, Атаман веднаш по натпреварот потенцираше дека судиите му доделиле шест поени на Балдивин, бидејќи досудиле два непостоечки, смешни фаули при шут за три поени, но во исто време нагласи дека ПАО продолжува понатаму, до завршниот турнир во Берлин.
Атаман на прес-конференцијата отиде чекор понатаму, велејќи дека ќе го напушти Панатинаикос доколку не избори пласман на завршниот турнир.
Макаби води во четвртфиналната серија со 1-0, вториот меч се игра вечерва повторно во Атина, а потоа следуваат два натпревари во Белград – 30 април и 2 мај, а евентуалната мајсторка ќе се игра на 8 мај во Атина.
Спорт
Гвардиола за Жоао Кансело: Ќе видиме на крајот на сезоната
Жоао Кансело е член на Манчестер Сити, а моментално е на позајмица во Барселона до крајот на сезоната. Прашање е дали Барселона сака да го отткупи неговиот договор, откако Португалецот беше означен како еден од главните виновници за елиминацијата од ПСЖ од Лигата на шампионите и поразот од Реал во Ел Класико.
Менаџерот на Манчестер Сити, Пеп Гвардиола изјави дека на крајот на сезоната ќе одлучи дали Кансело ќе се врати во клубот, пренесуваат британските медиуми.
„Се уште не сме разговарале за иднината на Кансело во нашиот клуб. Ќе разговараме на крајот на сезоната“, изјави Гвардиола.
Кансело (29) е член на Манчестер Сити од 2019 година. Тој има договор со англискиот клуб до 30 јуни 2027 година.
Вториот дел од минатата сезона Кансело го мина на позајмица во Баерн, а потоа Манчестер Сити го испрати португалскиот фудбалер на едногодишна позајмица во Барселона.
Кансело оваа сезона одигра 36 натпревари за Барселона и постигна четири гола.