Скопје, 12.12.2011 (Макфакс) – По пет месеци, и одиграни 18 кола, заврши есенскиот дел од првенството во Првата македонска лига (ПМФЛ).

По пет месеци, и одиграни 18 кола, заврши есенскиот дел од првенството во Првата македонска лига (ПМФЛ). Стартот на пролетниот дел од сезоната 2011/2012 од првото место ќе го започне  Вардар, екипа која сеуште не ја има почувствувано горчината на поразот во првенствените натпревари. „Црвено-црните“ есента ја завршија со 13 поебеди и пет нерешени средби и гол разлика 31:7. Единствениот пораз Вардар го доживеа во реванш четвртфиналната пресметка, во купот, со 11.Октомври (1:2), но тој пораз не го спречи пласманот на вардарци во полуфиналето. Вардар одигра пет средби во Купот на Македонија, забележа четири победи и еден пораз. Лидерот во првенството е заслужено на оваа позиција, избраниците на Илчо Ѓоргиоски, имаа константана форма, победуваа против „помалите“ тимови, а не загубија натпревар против директните конкуренти за титулата. Вардар го има најдобриот напад, заедно со Шкендија, и најдобрата одбрана во лигата, заедно со Металург, а Филип Ивановски со 14 погодоци е лидер на листата на стрелците. Во пролетниот дел Вардар ќе стартува со пет бода повеќе во однос на Металург и осум во однос на Шкендија. Токму Металург и Шкендија, според прикажаното и бодовната залиха ќе им бидат единствени конкуренти на „црвено-црните“ во борбата за титулата. Металург полусезоната ја заврши со само еден пораз, од Шкендија во Тетово, екипата на Ѓорѓи Христов, кој го наследи Жикица Тасески, првиот дел го финишираше со убедливата победа од 6:0 над Охрид. Шкендија, актуелниот првак, по 18 рунди, има осум бодови помалку од Вардар и три од Металург. Шкендија во есенскиот дел запиша четири порази (сите во првите десет кола) и тука е причината што екипата од Тетово не е поблиску до Вардар на табелата.  Како сега стојат работите 11.Октомври, Турново, Тетекс, Работнички, Напредок и Охрид ќе се борат за опстанок. Изненадувачки е што во ова друштво се наоѓа Работнички, кој во летните месеци и приреди толку многу радост на домашната фудбалска јавност. Можеби успешниот настап во квалификациите за Лига Европа, и подоцна, допинг аферата, е причината што младиот состав на дебармаалци го загуби ритамот и формата. Серијата од осум последовни порази го сместија Работнички,, во конкуренција на 12 екипи, на деветтата позиција.  Пролетниот дел од сезоната во ПМФЛ ќе стартува на 3.март следната година, Вардар во 19-то коло ќе го пречека Тетекс, додека конкурентите Металург и Шкендија ќе гостуваат во Кратово, кај Силекс, односно во Штип кај Брегалница.  крај/мф/нц