Спорт
50 трипл-дабл за Јокиќ – Денвер го декласира Милвоки, Лејкерси поразени од Финикс
Јубилејниот 50. трипл-дабл во кариерата на Никола Јокиќ, новиот пораз на ЛА Лејекрс и крајот на серијата на Мајами хит ја обележаа изминатата ноќ во НБА-лигата.
Денвер Нагетс убедливо победи во Милвоки со 128:97. Денвер ја забележа шестата победа на последните седум гостувања, а за Милвоки ова е прв пораз по серијата од пет победи.
Никола Јокиќ го предводеше својот тим со 37 поени, 10 скока и 11 асистенции за 36 минути колку што мина на теренот. Јокиќ е вториот центар во историјата на НБА-лигата, кој успеал 50 пати во кариерата да забележи трипл-дабл. Пред центарот на Денвер е само легендарниот Вилт Чембрлен.
Покрај Јокиќ, кај Денвер се истакна и Џамал Мареј со 24 поени и шест асистенции.
На спортивната страна Јанис Адетокумбо забележа 27 поени, осум скока и 11 асистенции.
Финикс Санс во Лос Анџелес ги победи Лејкерси со 114:104. Санс со оваа победа ги скокна Лејкерси на втората позиција на Западот.
Актуелните шампиони не успеаја да го избегнат поразот иако Леброн Џејмс постигна 38 поени. Во редовите на Санс најдобри беа Дарио Шариќ со 21, односно Деандре Ејтон и Девин Букер по 17 поени. Финикс има 12 победи на последните 14 натпревари.
Бостон Селтикс славеше победа во дуелот со ЛА Клиперс 117:112. Ѕвездите на Клиперс, Каваи Ленард и Пол Џорџ посригнаа 25, односно 32 поена, но не добија поддршка од соиграчите. Бостон едноставно тимски дејствуваше подобро на теренот. Кемба Вокер постигна 25, Џејлен Браун 18, а Џејсон Тејтум 14 поени.
Атланта Хокс изненадувачки стави крај на серијата од шест победи, во која се наоѓаа кошаркарите на Мајами хит. Хокс, предводен од Тре Јанг (18 поени, 10 асистенции) и Џон Колинс (17 поени, 17 скока), славеше победа 94:80.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Тонали сега е на удар и на Англичаните поради обложувањето
Играчот од средниот ред на Њукасл, Сандро Тонали е под истрага од Фудбалската асоцијација (ФА) поради прекршување на правилата против обложување.
Италијанецот веќе отслужува 10-месечна суспензија од Италијанскиот фудбалски сојуз поради обложување за време на неговото играње за Милан.
Новите докази покажуваат дека Тонали се обложувал и кога дошол во Њукасл. Младиот 23-годишен играч го прекршил правилото дури 50 пати од 12 август до 12 октомври 2023 година.
На Тонали му е даден рок до 5 април да одговори на обвиненијата.
„Добивме потврда дека е покрената истрага. Клубот и Тонали целосно ќе соработуваат. Тоа е се што можеме да кажеме во моментов“, се вели во соопштението за медиумите на клубот.
Тонали пристигна во Њукасл минатиот јули во трансфер вреден 60 милиони фунти од Милан.
Спорт
Најдобриот судија во БиХ поради закани одби да им суди на Железничар и Сараево
Шампионатот на Босна и Херцеговина влегува во завршна фаза, а локалниот портал „Спортспорт“, пишува дека најдобриот судија, Ирфан Пељто одбил да им суди на клубовите кои доаѓаат од главниот град Железничар и Сараево) до крајот на сезоната.
Пељто тоа го направил поради наводните закани што ги добивал тој и неговото потесно семејство, кои ги пријавил во полиција. Најдобриот судија од БиХ за својата одлука го известил Судискиот комитет на Фудбалскиот сојуз на Босна и Херцеговина, кој ја прифатил неговата одлука.
Железничар и Сараево ќе одиграат неколку дерби натпревари до крајот на сезоната, но Пељто нема да суди на ниту еден од нив.
Тој требаше да биде главен судија викендов на дербито меѓу Железничар и Вележ, но главен судија на „Грбавица“ ќе биде Елведин Топузовиќ. .
Пељто гради завидна кариера на меѓународен план и често суди натпревари во Лигата на шампионите. Неодамна судеше на пријателскиот натпревар меѓу Словенија и Португалија, а претходно го судеше и натпреварот Лајпциг- Реал Мадрид.
Речиси е сигурно дека ќе суди на ЕП.
Спорт
Интер подготвува нов договор за Инзаги
Интер е апсолутен лидер во Серија А, прашање е само кога и математички ќе ја обезбеди шампионската титула, која ќе биде прва во кариерта на Симоне Инзаги. 47-годишниот тренер досега има освојувано трофеи само во Купот и Суперкупот на Италија.
Она што Инзаги го направи оваа сезона во Серија А, ги натера клупските челници да ја сменат својата стратегија и да му понудат нов договор на тренерот.
Инзаги досега двапати го продолжуваше договорот со Интер, во 2022 и 2023 година, двата пати клубот му понуди едногодишен договор. Овој пат на 47-годишниот тренер ќе му биде понуден двегодишен договор.
Во однос на претходните години, разликата е што на Инзаги ќе му биде понуден нов договор пред да заврши сезоната, а не откако таа ќе заврши.
Интер е на чекор до освојување на шампионската титула во Серија А, откако по 29 кола е прв на табелата со 76 бодови, 14 повеќе од второпласираниот градски ривал Милан.