Фудбалерите на Астон Вила и Фрајбург ќе се борат за пехарот во Лига Европа. Вила во англиската пресметка го декласира Нотингем Форест со 4:0, додека Фрајбург ја искористи предноста, играше од седмата минута со фудбалер повеќе и ја победи Брага со 3:1.

Специјалистот за Лига Европа, Унаи Емери, сега тренер на Астон Вила, шести пат во кариерата ќе се бори за трофејот во ова натпреварување. Три пати победи со Севилја, еднашп со Виљареал, пораз доживеа само со Арсенал.

Форест пристигна во Бирмингем со минимална предност, но надежите за трето европско финале брзо почнаа да се топат. Домаќините наметнаа силен ритам од самиот почеток, а Оли Воткинс го скрши отпорот на гостите во 36-та минута, кога го израмни вкупниот резултат по асистенција на Буендија. Притисокот на Вила продолжи и во второто полувреме, а во 58-та минута Буендија го дуплираше водството од пенал и го донесе својот тим на прагот од финалето.

Кога се чинеше дека на Форест му треба само еден гол за продолжение, капитенот на Вила, Џон Мекгин, стапи на сцена и ги реши сите дилеми со два брзи гола. Прво, во 77-та минута, откако Воткинс му ја спушти топката, тој го погоди долниот агол со прецизен удар од работ на шеснаесетникот за 3:0.

Само три минути подоцна, Мекгин повторно ја погоди мрежата. Морган Роџерс го пронајде на околу шеснаесет метри оддалеченост, а шкотскиот играч од средниот ред мирно ја испрати топката во блискиот агол за конечни 4:0.

Натпреварот во Фрајбург започна во фантастична атмосфера, со импресивна кореографија од навивачите на Фрајбург кои го обоија целиот стадион во црвено-бели бои. Но, драмата започна веќе во шестата минута. По брзата проигрување, Јан-Никлас Бесте се најде сам пред голот, а Марио Доргелес го собори како последен играч во одбраната. Судијата Давиде Маса веднаш покажа директен црвен картон, оставајќи ја Брага со десет играчи на теренот.

Со играчот повеќе, Фрајбург ја презеде целосната контрола. Притисокот се исплатеше во 19-та минута. По центаршутот на Винченцо Грифо и лошото расчистување од гостинската одбрана, топката дојде до Лукас Киблер, кој некако успеа да ја турне во мрежата од за водство од 1:0.

До крајот на полувремето, Фрајбург продолжи да доминира, а во 41-та минута Јохан Манзамби го погоди горниот десен агол со прекрасен удар од 20 метри за 2:0, отворајќи ја вратата кон финалето.

Сепак, Брага ги покажа заби во судиското продолжение од првиот дел, создавајќи огромна двојна шанса. Прво, Виктор Гомез ја погоди стативата, а потоа ударот на Залазар од гол-линијата го одбрани дефанзивецот Треу.

Во 72-та минута приказната заврши. По центаршутот на Грифо од слободен удар, Лукас Киблер скокна највисоко и со глава ја протурка топката под пречката за 3:0. Тоа беше неговиот втор гол во натпреварот, со кој стана апсолутен херој на полуфиналето и започна голема прослава на трибините на стадионот „Европа-Парк“. До крајот на натпреварот, Брага постигна гол, во 79-та минута, преку Пау Виктор, потоа притисна со играч помалку, но Фрајбург успеа да се одбрани и да се пласира во првото европско финале.

Финалниот меч се игра на 20 мај во Истанбул.

Foto/ EPA

Фудбалерите на Кристал Палас и Рајо Ваљекано ќе играат во финалето на Конференциската лига за сезоната 2025/26.

Кристал Палас ја продолжија својата сезона од соништата и се квалификуваа за европското финале за прв пат во историјата, бидејќи го елиминираа Шахтјор од Донецк во полуфиналето со вкупен резултат од 5:2. Во реваншот на стадионот „Селхерст Парк“, победија со 2:1. Истото важи и за Рајо Ваљекано, малиот клуб од шпанската престолнина прв пат ќе игра финале, а до него стигна со две победи од по 1:0 над Стразбур.

Палас го победи Шахтјор во реваншот со 2:1. По првиот дел беше нерешено 1:1, откако Енрике си постигна авто гол, а изедначи со прекрасен гол, Егвиналдо. Победата на Палас им ја донесе Исмаила Сар.

Рајо Ваљекано блескаше во Стразбур, го надигра домаќинот, особено во првото полувреме, кога односот на ударите кон голот беше 13:1 за шпанскиот тим. Единствениот гол го постигна Алемао во 42-та минута.

Финалето во Конференциската лига ќе се одигра на 27 мај во Лајпциг.

Foto/ EPA

Дефанзивецот на Реал Мадрид, Ферланд Менди, наводно ќе отсуствува повеќе од една година поради неговата последна сериозна повреда.

30-годишникот беше принуден да го напушти теренот по само 14 минути од победата на Реал Мадрид од 2:0 над Еспањол минатиот викенд. Првичните извештаи сугерираа дека тој ќе отсуствува околу пет месеци по операцијата, но повредата се чини дека е полоша отколку што првично се мислеше.

Според новинарот на „COPE“, Мигел Анхел Дијаз, оваа последна повреда значи дека Менди веројатно ќе отсуствува повеќе од една година.

Во извештајот се наведува дека неговата повреда е многу посериозна отколку што првично се веруваше и дека станува збор за кинење на тетива со раздвојување на коските.

Некои медиуми во Шпанија одат чекор понатаму и пишуваат дека е доведено во прашање и продолжувањето на неговата кариера, бидејќи во последно време имал многу проблеми со повредите.

Менди пропушти повеќе од 50 натпревари во претходните две години поради повреди. Оваа сезона, тој запиша само осум натпревари. Проблемот со телото очигледно постои, па затоа пишувањата на медиумите за крајот на неговата кариера не се без основа.

Досега, Реал Мадрид и францускиот фудбалер не се огласија, па затоа сè уште нема официјална потврда.

Foto/ Depositphotos