Спорт
Барса продава „дете од Ла Масија“ – Алења се сели во Хетафе
Доскорешниот играч на Барселона, Карлес Алења е нов фудбалер на прволигашот Хетафе. Тој во новиот клуб доаѓа за сума од 5 милиони евра и 50% од наредната негова продажба.
Алења има 23 години и целиот свој фудбалски „стаж“ го има во Барселона, ако не се сметаат позајмиците. Една година беше надвор од клубот, на позајмица во Бетис.
За Барселона Б одигра 89 натпревари и постигна 14 гола, додека во првата екипа настапи на 44 со ефект од 3 постигнати погодоци.
Играчот од средниот ред и претходната сезона беше на позајмица, во клубот каде ќе ја продолжи кариерата – Хетафе. Имаше на контото 2 гола и 2 асистенции.
Иако цената на „трансфермаркт“ му е 15 милиони евра, Барса прифати трипати пониска сума и процент од наредната продажба.
Се чини дека клубот од „Ноу Камп“ по секоја цена сака да направи простор за нов договор со Лео Меси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Евертон ги згасна шампионските сништа на Ливерпул
Шампионските сништа на Ливерпул во „Мерсисајд“ дербито ги згасна Евертон. „Карамелите“, вечерва славеа со 2:0 и прв пат по 14 години славеа како домаќини над градскиот ривал.
Корнерите му пресудија на Ливерпул на „Гудисон парк“. Најпрвин реализираше Брејтвајт во 27., а точка на мечот стави Калверт-Лувин во 58.минута.
Ливерпул остана втор на табелата со три бода помалку од Арсенал, трет е Манчестер сити со четири бода и два натпревари помалку.
Евертон, со сите проблеми што ги има сезонава (одземањето на бодови), се чини дека со овој триумф го обезбеди опстанокот во лигата.
На „Олд Трафорд“, нова мачна партија на Манчестер јунајтед. Тимот на Тен Хаг губеше до 61.минута од најслабиот тим во Премиер лигата. На крајот „црвените ѓавли“ славеа со 4:2.
Шефилд поведе во 35. минута преку Богл, а Мегваер израмни во 42. Гостите го вратија водството во 50. минута, кога Чилеанецот Бреретон-Дијаз го совлада Онана. Бруно Фернандеш од пенал во 61. минута изедначи на 2:2.
Во финишот дојде до израз напаѓачкиот квалитет на Јунајтед, па домашните славеа со головите на Бруно Фернандеш во 81. минута и Хојлунд во 85. минута.
Кристал Палас е во одлична форма под водство на новиот менаџер Оливер Глезнер, а по Ливерпул и Вест Хем неговата сила ја почувствува и Њукасл. Двоен стрелец беше Матета во 55. и 88. минута.
Во Вулверхемптон, Бурнемаут со голот на Семења во 37. минута победи со 1:0.
Спорт
Чави се предомисли, останува на клупата на Барселона
Чави Ернандез и наредната сезона ќе ја предводи екипата на Барселона.
Клупските челници од стадионот „Камп Ноу“ и Чави имаа средба во текот на денот и се договориле нивната соработка да продолжи.
Договорот бил постигнат во вилата на претседателот Џоан Лапорта.
Чави пред неколку месеци најави дека ќе си замине на крајот на сезоната, но се предомисли.
Шпанските медиуми пренесуваат дека тренерот потпишал нов едногодишен договор и дека во клубот со кој имаше многу успеси како играч ќе остане до 30 јуни 2025.
Барселона моментално е на второто место во Ла Лига, со 11 бодови помалку од лидерот Реал.
Спорт
Претседателот на Ла Лига јавно кажа дека е навивач на Реал
Претседателот на шпанската Ла Лига, Хавиер Тебас отворено призна дека навива за Реал Мадрид во интервју за „Експансион“. Овој факт е познат од поодамна, но сега за прв пат е и јавно потврден. Овој детал Тебас го откри додека го коментираше евентуалниот трансфер на Килијан Мбапе во Реал.
„Прво и основно, сето ова го кажувам како навивач на Реал Мадрид. Тоа е неверојатен трансфер, Мбапе е еден од најдобрите фудбалери во светот. Не можам да кажам дека е најдобар бидејќи мислам дека Белингам е најдобар, и зад него е Винисиус“, рече тој и потоа додаде:
„Мбапе е еден од најдобрите фудбалери во светот, затоа мора да бидеме среќни бидејќи таков играч доаѓа во нашата лига. Знам како Реал Мадрид планира да го обезбеди неговиот потпис, и покрај загриженоста и нестрпливоста на медиумите. Тоа го направија во добар момент.”
Да потсетиме, Мбапе на лето доаѓа во Реал Мадрид како слободен играч, откако ќе му заврши договорот со ПСЖ.