Комесарот на НБА лигата, Адам Силвер вели дека тие нема да поставуваат услов за вакцинирање за КОВИД-19, но додава дека верува дека повеќето кошаркари на крајот ќе се решат да го направат тоа.

„Во  бројките на вакцинираните во САД и во однос на јавното мислење, гледаме дека луѓето се навикнуваат на идејата на вакцина. Мислам дека откако десетина милиони луѓе добија вакцина, скептиците ќе се убедат на ефикасноста на вакцините. Сметам дека повеќето кошаркари на крајот ќе решат да добијат вакцина. На крајот, тоа е нивна лична одлука, бидејќи ние нема да приморуваме никого“, вели Силвер.

Според здравствените протоколи на НБА лигата, кошаркарите мораат да се тестираат до трипати дневно и мораат да одат во карантин ако биле во близок контак со некој кој бил позитивен. Тоа двапати му се случи на ѕвездата на Бруклин нетс, Кевин Дурент. Доклку добил вакцина, тој немаше да мора да оди во карантин.

„Покрај здравствените придобивки за нивното семејство, мислам дека треба да се вакцинираат. На пример, сега има препорака дека ако си вакциниран, не мораш во карантин по близок контакт. Многу наши играчи мораа да паузираат и покрај тоа што имаа негативни тестови“, додава Силвер.

Легендарниот менаџер на Манчестер јунајтед, Сер Алекс Фергусон признава дека се плашел дека ќе го загуби сеќавањето и гласот откако доби мозочен удар во 2018 година.

79-годишниот Шкотланѓанец, кој сигурно е еден од најголемите фудбалски тренери во историјата, мораше да оди на операција и помина неколку дена во болницата во Салфорд по болеста.

„Една од првите работи кои ги кажав денот по операцијата кога моето семејство дојде да ме види, беше за моето сеќавање. Преживеав со сите прекрасни сеќавања на мојот живот. Следната недела го загубив гласот. Не можев да кажам ништо и тоа беше ужасно. Работите ми поминуваа низ умот – дали ќе ми се врати сеќавањето? Дали повторно ќе можам да зборувам?“, вели Фергусон.

Тој објаснува дека по работа со лекарите, гласот му се вратил по 10 дена.

„Терапевтот за говор дојде и ми кажа да ги запишам сите членови на семејството , на мојот фудбалски тим. Таа ме прашуваше прашања за животни, риби, птици.. На крајот, по 10 дена ми се врати гласот. Кога поминав ни тоа, сфатив дека сеќавањата ми се тука“, објаснува Ферги.

Алекс Фергусон беше менаџер на Манчестер јунајтед од 1986 до 2013 година, освојувајќи 13 титули од Премиер лигата, 5 ФА купа и две титули од Лигата на шампионите. Во 1999 година беше прогласен за витез од кралицата Елизабета Втора, откако Јунајтед освоија тројна титула (ЛШ, Премиер лига и ФА куп).

Пеп Гвардиола вели дека Манчестер сити заслужиле почит како врвен клуб поради тоа што постојано се борат за титулата во Премиер лигата, за разлика од другите големи англиски клубови кои честопати не влегуваат ниту во Лигата на шампионите.

Сити може да направи голем чекор до трета титула од Премиер лигата во последните четири години доколку во градското дерби го совладаат второпласираниот Манчестер јунајтед, а веќе се во финалето на Карабао купот, во четврт-финалето на ФА купот и имаат 2:0 предност од првиот меч од осминафиналето на Лигата на шампионите против Борусија Менхенгладбах.

„Најубава работа која ја направи клубов во последната деценија е што секогаш кога ја освојувавме титулата, следната сезона повторно бевме во борба за титула. Најниска позиција по освојување на титулата беше второ место. Ако ги погледнете другите шампиони, тие се борат за место во топ 4 и тоа покажува дека ние ја имаме постојаноста цело време. Не е важно во кое натпреварување, ние одиме на победа и само на победа. Една титула се освојува, но кога си постојано во борба за титулата, цела деценија, тоа е нешто што носи гордост. Затоа сме врвен клуб“, вели Гвардиола.

Ова доаѓа откако минатогодишиот шампион Ливерпул е на седмото место во Премиер лигата и ги очекува битка за пласман во ЛШ. Челси во 2017/18 и 2015/16, Лестер во 2016/17 и Манчестер јунајтед во 2013/14 не успеаја да влезат во топ 4 една година откако ја освоија титулата. Сити, пак, се единствениот клуб во 12 години кој освои две титули во низа (2017/18 и 2018/19) и влегоа во ЛШ 10 сезони во низа.