Дешан: Дали овој судија има квалитет за полуфиналето на СП!?

Селекторот на Франција, Дидие Дешан, не го криеше своето разочарување по поразот од Шпанија (0:2) во полуфиналето на Светското првенство, признавајќи дека неговиот тим бил послаб, но во исто време го доведе во прашање квалитетот на судењето од страна на Салвадорецот Иван Бартон.

Шпанија ја победи Франција со 2:0 во полуфиналето на Светското првенство и се пласираше во финалето.

„Секако дека сме разочарани. Играчите се скршени затоа што имавме големи амбиции. Мораме да бидеме реални и да признаеме дека денес технички бевме ниво подолу од тимот кој точно знаеше што прави. Главната одговорност е наша“, рече Дешан.

Сепак, францускиот стручњак не ја пропушти можноста да коментира за судијата.

„Имам едно прашање на кое нема да одговорам, дали судијата беше на ниво да го води полуфиналето на Светското првенство? Имаше неколку контроверзни ситуации и нема да навлегувам во тоа. Не го кажувам ова затоа што загубивме, туку затоа што имаше одлуки кои честопати беа на наша штета“, рече Дешан.

Најмногу контроверзии предизвика пеналот за Шпанија, досуден по фаул на Лука Дињ врз Ламин Јамал, од кој „црвената фурија“ поведе.

Дешан потоа повторно беше самокритичен.

„Главната причина за поразот е што бевме под нашето ниво и помалку опасни во нападот отколку што можевме да бидеме. Направивме технички грешки и промашивме додавања што можеа да создадат шанси за гол. Мораме да го прифатиме тоа. Ова е највисоко ниво на фудбал, колку и да боли.“

Франција ќе се бори за третото место на Светското првенство, а Дешан рече дека неговиот тим ќе се потруди да го заврши турнирот со победа.

„Ова беше последниот чекор до евентуално финале… Сега ќе играме за третото место. Ќе го играме тој натпревар што е можно посериозно, а тоа не го намалува она што го постигнавме досега. Сепак, во овој натпревар Шпанија покажа нешто повеќе“, рече Дешан.

За третото место ќе играат против поразениот од дуелот меѓу Англија – Аргентина.

Foto/ EPA