Баерн Минхен уште на гостувањето во Рим го одлучи двомечот со Лацио, триумфирајќи со убедливи 4:1 на „Олимпико“ во првиот меч од осминафиналето од Лигата на шампионите, додека на „Стемфорд бриџ“ Челси ќе има предност од 1:0 откако Атлетико Мадрид во Букурешт одиграа слаб меч, кој беше „спасен“ со фантастичниот гол со ножички на Оливие Жиру.

Дека Лацио нема што да бара против светскиот и европски шампион стана јасно во првото полувреме во кое Баерн направи 0:3 предност. Роберт Левандовски доби „подарок“ во деветтата минута од мечот за нов гол, младиот Англичанец Џамал Мусијала зголеми на 0:2 во 24. минута, пред Лирој Сане во 42. минута да донесе 0:3 за тимот на Ханси Флик.

Второто полувреме стана уште полошо за Лацио, откако Франческо Ачерби си постигна автогол во 47. минута, пред Хоакин Кореа две минути подоцна да постигне утешителен гол за домаќините.

На „Националната арена“ во Букурешт, каде што Атлетико беше домаќин на Челси, не се одигра најубавиот меч во Лигата на шампионите, откако посебно во првото полувреме двата тима немаа многу шанси, а Диего Симеоне дозволи Челси да го диктира темпото и поседот на топката. Тимо Вернер имаше убава шанса во првото полувреме, која ја одбрани Јан Облак, пред во второто полувреме, Оливие Жиру во 74. минута да постигне спектакуларен гол со ножички, кој по ВАР проверката беше признат.

Giroud ??? pic.twitter.com/HlJEn3ZsZX

— JPronos23💰🏀 (@JPronos23) February 23, 2021

ЛИГА НА ШАМПИОНИ, 1/8 ФИНАЛЕ, 1.МЕЧ

Атлетико Мадрид – Челси 0:1

Лацио – Баерн Минхен 1:4

Новиот македонски селектор, Кирил Лазаров му даде три гола на својот поранешен клуб ППД Загреб за Нант да стигне до 30:28 победа над хрватскиот клуб и да го остави без поен во ЕХФ Лигата на шампионите оваа сезона.

Иако во поголемиот дел од мечот исходот беше неизвесен, францускиот клуб на крајот стигна до победа со два гола разлика за да се доближи до борбата за првите четири места во групата Б. Ветеранот Валеро Ривера повторно беше најдобар за Нант со 10 гола, Адријан Фигуераш додаде шест, додека за Загреб, Матеј Хрстиќ со 5 гола беше најефикасен.

Пари Сен-Жермен пак, со 37:26 го растури лидерот во групата А, Кјелце, доминирајќи во текот на целиот натпревар за конечно да се вратат во добра форма. Лук Стаинс и Микел Хансен постигнаа по шест гола за тимот на Раул Гонзалес, додека за Кјелце, Шимон Сицко заврши со шест. Кјелце останува лидер на групата со 15 поени пред Флензбург со 15 и ПСЖ со 12.

ЕХФ ЛИГА НА ШАМПИОНИ

ГРУПА А

Пари Сен-Жермен – Кјелце 37:26 (19:10)

Табела: 1.Кјелце 17, 2.Флензбург 15, 3.ПСЖ 12, 4.Мешков 11, 5.Пик Сегед 10, 6.Порто 8, 7.Елверум 5, 8.Вардар 4

ГРУПА Б

Кил – Алборг 28:26 (15:15)

Нант – ППД Загреб 30:28 (13:14)

Табела: 1.Барселона 24, 2.Веспрем 17, 3.Алборг 12, 4.Мотор 12,  5.Кил 11, 6.Нант 10, 7.Целје 6, 8.Загреб 0

Најпознатиот голфер на сите времиња, Тајгер Вудс е во болница во Калифорнија откако доби повеќе повреди на нозете откако излета со својот автомобил во близината на Ранчо Палос Вердос.

Шерифот на Лос Анџелес потврди дека 45-годишниот Вудс бил извлекуван од автомобилот пред тој да биде пренесен во локалната болница.

„Возачот и единствениот во возилото беше ПГА голферот, Елдрик ‘Тајгер’ Вудс. Господинот Вудс беше изваден од возилото со помош на пожарникарите и пренесен во локалната болница“, објавија од канцеларијата на шерифот.

Неговиот агент, Марк Стајнберг потврди дека тој бил во „несреќа со едно возило“ и дека има „повеќе повреди на нозете“.

„Тој во моментов е на операција и затоа ви благодариме на поддршката и почитувањето на приватноста“, изјави Стајнберг.

Вудс, кој сигурно ќе заврши во Куќата на славните на голфот, ја освои својата 15. гренд слем титула во 2019 година, по петти пат триумфирајќи на Мастерсот.