Домашен
АБА лига: МЗТ ја декласира Крка
Невообичаениот пладневен термин не им пречеше на кошаркарите на МЗТ Скопје убедливо да ја совладаат Крка со 89:65 (27:21, 14:19, 22:13, 26:12 ) , во рамките на 22.коло во АБА лигата. МЗТ со осмата победа се искачи на 10-то место на табелата, додека Крка остана на последното место со само седум победи колку шти имаат Морнар и Задар.
МЗТ го одигра најдобриот меч сезонава во регионалната лига и на крајот убедливо славеше против директниот конкурент во борбата за опстанок во лигата.
Македонскиот шампион делуваше шутерски беспрекорно во првиот период, неговите играчи промашија само три шутеви од поле, но тој ритам Крка успеа да го испрати и да има само шест поени негатива по стартните 10 минути.
Вториот период донесе израмнета игра, бидејќи МЗТ не успеа да воспостави контрола во дефанзивниот скок, во финишот Луковиќ и Ребец реализираа 2+1 за 41:40 на полувремето.
Стартот на третата четвртина донесе период во кој двата тима погодуваа во серии, најпрвин Дреновац го однесе МЗТ на разлика од осум поени, но Крка веднаш со серија од шест кошеви се врати во мечот.
МЗТ, како што се покажа на крајот прашањето на победникот го реши во последните три минути од третата четвртина кога со серија 9:0, прв пат стекна двоцифрена предност (59:48). во таа серија Ван Остром постигна пет поени.
Во последниот период МЗТ лесно ја одржуваше двоцифрената предност, а на три и пол минути до крајот со поените на Тејмс и тројката на Симоновски стигна до плус од 20 поени во однос на противникот.
Играч на мечот беше Џош Скот кој повторно забележа „дабл-дабл“ (24 поени, 13 скокови, индекс 25) и ја истакна кандидатурата за најдобар играч во ова коло.
Покрај Скот двоцифрен број на поени постигнаа уште Ксавиер Тејмс (16), Ѓорѓе Дреновац (14 поени, 5 скока, 4 асистенции) и Шарлон Клоф (13 поени).
Во наредното коло кошаркарите на МЗТ Скопје ќе гостуваат кај ФМП. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.