Домашен
Ракометарите ја победија БиХ, Червар: Одигравме солидно
Македонската ракометна репрезентација ја совлада Босна и Херцеговина 28:24 во првиот од трите подготвителни натпревари. Овој меч се одигра пред полните трибини во СРЦ Кале, додека останатите два, кои на програмата се во среда и четврток, ќе бидат од затворен карактер.
Напорните подготовки кои Лино Червар со своите избраници ги спроведе во Маврово оставија трага врз репрезентативците, кои во текот на целиот меч против Босна и Херцеговина осцилираа во играта.
Македонија рано создаде висока предност, најпрвин 8:2, 12:4, а потоа 13:6, со поставата која веројатно ќе биде ударна во Франција (бекови Лазаров, Миркуловски, Талески, крила, Манасков и Георгиевски и пивот Стоилов), но по ветувачките 15 минути, избраниците на Червар му дозволија на противникот да се врати со серија од четири гола.
По слично сценарио се играше и во останатиот дел од натпреварот, Македонија најчесто ја имаше предноста од три до пет гола, но често му дозволуваше на противникот да прави серии, кои му овозможија неколку пати во вториот дел да се доближи на само два гола негатива.
„Прв натпревар по напорните подготвки. Мислам дека добро почнавме, игравме многу цврсто и тука направивме разлика, во тие моменти промашивме неколку зицери и пенали. Во текот на натпреварот многу менувавме, ние во записникот имавме 21 играч, сите добија можност да играат. Некои имаа добро издание, некои одиграа послабо. Сепак мислам дека бидејќи се работи за прв натпревар дека имаше добри работи, имаше и грешки и слабости, кои ќе ги анализираме. Но да не заборавиме дека игравме со 21 играч и дека сакавме да видиме, кој што може да направи. Вкупната оценка е солидна“, изјави по натпреварот македонскиот селектор Червар.
„Имавме добри и лоши моменти. Но бидејќи ова е прв натпревар треба да бидеме задоволни, треба да ги исправиме грешките, остануваат уште два дуели од затворен карактер, каде што ќе можеме да пробаме некои работи. Нашиот стручен штаб по овој натпревар има појасна слика. Во секој случај треба да бидеме позитивни. Треба добро да ги искористиме овие десет дена колку што останува до почетокот на СП. Јасно е дека имаме позитивни, но и негативни страни кои треба да ги отстраниме. Јас сум оптимист, иако ситуацијата е тешка, бидејќи прв пат одиме на едно натпреварување како аутсајдери.“, рече капитенот на репрезентацијата Кире Лазаров.
Македонската репрезентација ја предводеше Манасков со седум голови, по пет постигнаа Кире Лазаров и Стоилов, а три повратникот во репрезентацијата Миркуловски. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.