Домашен
ФФМ предлага формирање на Одбор на прволигаши
Македонските прволигашки клубови денеска беа на работен состанок во Фудбалската федерација на Македонија, каде што дискутираа за иницијативата на ФФМ за формирање Одбор на прволигаши.
Одборот првично би ја имал улогата на советодавно тело на Управниот одбор на ФФМ поврзано со функционирањето на Првата лига, предлозите за евентуална промена на правилникот и пропозициите како и подигнувањето на квалитетот на арбитражата и делегирањето на официјалните лица.
„Со евентуалното формирање на Одбор на прволигаши заеднички би ги носеле одлуките во однос на натпреварувањето, т.е. Вие како посебно тело би давале предлози и забелешки пред Управниот одбор на федерацијата. На тој начин, клубовите би го имале најголемото влијание во однос на организацијата на натпреварите, делегирањето на официјалните лица, во однос на термините за натпревари, суспензиите итн. На овој начин или со овој предлог, ФФМ не сака да наметне ново тело кое би функционирало само на хартија, туку напротив, би добиле сериозно фудбалско тело кое би одлучувало заедно со нас за натпреварувањето од Првата лига“, изјави претседателот на ФФМ, Илчо Ѓорѓиоски.
Сите претседатели на клубовите од Првата лига кои присуствуваат на состанокот (Вардар, Шкендија, Работнички, Шкупи, Брегалница, Ренова, Силекс, Македонија Ѓ.П., Победа и Пелистер) позитивно се изјаснија по предлогот на ФФМ, нагласувајќи дека е многу позитивно што предлогот доаѓа од страна на ФФМ и ова е можност сите клубови да ја искористат поддршката на Федерацијата.
На состанокот присуствуваа и генералниот секретар на ФФМ, Филип Поповски, претседателот на натпреварувачката комисија Васко Дојчиновски, претседателот на судиската организација Емил Божиновски кои се вклучија во дискусија со претставниците на клубовите.
Начелно е договорено да се формира работна група со претставници од клубовите и од службите во федерацијата која би го разгледала конкретниот предлог за формирање Одбор на прволигаши, би дале свој предлози и забелешки пред официјално да започне да функционира како посебно советодавно тело на У.О. на ФФМ. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.