Домашен
28-мо издание на Охридскиот пливачки маратон
Охридскиот маратон, претпоследен од Гран при серијата на ФИНА, во сабота ќе се плива по 28-ми пат. На маратон, чии старт е закажан за 12 часот, ќе учествуваат 22 пливачи во двете конкуренции (16 во машка и 6 во женска).
Македонија ќе има четворица пливачи Томи Стефановски, Евгениј Поп Ацев, Александар Панчевски и Александар Илиевски, додека во женска конкуренција нашата земја нема да има своја претставничка.Стефановски, кој оваа сезона има одлични резултати во маратонското пливање, неодамна победи и на трката во Сен Жан (Канада) е еден од фаворитите за висок пласман. Големи амбиции има и Евгениј Поп Ацев кој минатата година маратонот го заврши на четвртото место. Мината година Евгениј Поп Ацев ја заврши како втор во вкупниот пласман со само еден бод помалку од победникот Дамијан Блаум од Аргентина. Охридскиот пливачки маратон може да даде многу одговори кога во прашање е генералниот пласман во машка конкуренција, доколу Стефановски победи тогаш на една трка до крајот со голема веројатност ќе го обезбеди првото место во генералниот пласман, што ќе биде историски резултат за македонското маратонско пливање. Според резултатите во оваа сезона најголеми конкуренти на Стефановски и Поп Ацев ќе им бидат Жоанес Хедел од Франција и Канаѓанецот Ксавиер Дешарне. Во женска конкуренција на првото место во генералниот пласман во конкуренција се две натпреварувачки Аргентинката Геихо Пилар и Силви Рибарова од Чешка и двете имаат по 80 бодови. Двете маратонки го имаат пријавено своето учество на маратонот во Охрид.Трката ќе се плива на патеката „Климе Савин“ од Свети Наум до градското пристаниште во Охрид, во должина од 30 километри.Победниците од минатата година Рејмонд Аксел од Франција во машка и Италијанката Мартина Грималди во женска конкуренција, не се пријавија за учество во трката. Инаку Аксел лани постави нов рекорд на патека 5:09:54.95 часа. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.