Домашен
Агресивна зона рецепт за победа над Мотор Запорожје
Ракометарите на Металург во четврток ќе го одиграат натпреварот од седмото коло во Д групата во Лигата на шампионите, против Мотор Запорожје. По шест кола Мотор заедно со Скјерн и Баја Маре се наоѓа на делба на првата позиција во групата, додека Металург е претпоследен со две победи и четири порази. Првата пресметка на двата тима на 19. септември, заврши со победа на украинскиот шампион (30:24).
Мотор е квалитетен тим, еден од ретките кој константно игра брз центар, со искусни ракометари, поради тоа е фаворит, но Металург во претходните шест средби покажа дека може да игра со поискусни екипи, што е причина за умерен оптимизам во пресрет на мечот.
„Јас верувам во оваа наша млада екипа и ветувам дека ќе се бориме, ќе се обидеме да победиме. Се надевам дека ќе успееме да ја задоволиме публиката. Многу луѓе го препознаа нашиот проект, времето работи за нас. Можам да кажам дека на пролет, кога домашното првенство ќе влезе во завршната фаза, дека Металург нема да биде статист, туку ќе биде тим на кој сериозно ќе се гледа“, рече на прес-конференцијата тренерот на Металург, Лино Червар.
Надворешната линија и пикерот Шавељев се движечката сила на Мотор, високата бековска линија на противникот Металург ќе се обиде да ја сопре со една длабока одбрамбена формација.
„Ќе мора да играме агресивно во одбраната, ќе мора да ги нападнеме, поради тоа ќе мора да одиграме длабока зона, тоа го подготвувам последната недела. Исто така, тие се екипа која константно игра брз центар, не менуваат играчи туку сите по примен гол веднаш одат напред. Стилот кој го негува Мотор не ни одговара, но мислам дека со борбена игра, ќе успеме да ги надоместиме некои наши објективни слабости“, додаде хрватскиот стратег на клупата на Металург.
На натпреварот со Мотор ќе дебитира и најновото засилување на Металург, Словенецот Давид Шпилер, кој со своето искуство треба да му донесе на тимот стабилност во нападот и да ги разигра соиграчите.
„Тој е класичен плејмејкер, тој е играч кој е продолжена рака на тренерот. Шпилер е искусен играч кој знае што сака. Мене ми е важно тој да се вклопи во нашиот стил на игра, сега имаме млади играчи и играме побрзо во нападот и поагресивно во одбраната“, рече Червар.
Натпреварот меѓу Металург и Мотор Запорожје, в четврток ќе започне во 17:45 часот во СЦ „Борис Трајковски“./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.