Домашен
Червар ја најави новата стратегија на Металург
Ракометниот шампион на Македонија, екипата на Металург, в сабота против Татран Прешов ќе ја стартува новата сезона. Плановите и амбициите на клубот во петокот на прес-конференција ги претстави тренерот Лино Червар.
„Оваа година нашите планови и стратегија ќе бидат малку изменети, а тоа не е случајно, тоа е нешто што беше најавено. Ние добро ги анализиравме нашите три години во Лигата на шампиони и убедени сме дека го постигнавме максимумот. Со еден тим каков што е Металург, три години тргнувавме од квалификациите и стигнувавме до најдобрите осум. Знам дека сите ние секогаш сакаме повеќе, но морам да кажам дека за Фајнал фуор во ЛШ треба нешто повеќе, требаат пари и политика“, рече Червар. „Ние не се откажуваме од ЛШ, ќе се обидеме и оваа година ќе дадеме се од себе за да играме добро. Групата во која сме е тешка, ПСЖ е многу силен, тука е Загреб, да не го споменувам Кил, тука е Брест Мешков кој донесе многу засилувања, тим кој има 14 странци. Но ние нема да се предадеме“, дополни предводникот на Металург.Червар ја најави и новата две годишна програма на клубот, во која најголема шанса треба да добијат младите играчи.„Металург оваа година се определи за еден нов проект каков што нема никој во Европа. Клубот од оваа сезона започнува две годишен проект чии темел ќе биде младоста. Металург оваа и наредната сезона треба да биде спој на младост и искуство, носители на проектот ќе бидат Мојсоски, Миркуловски, Јоноски, Маркоски. Металург ќе биде вистинско освежување во ЛШ“.Екипата од Автокоманда оваа сезона во ростерот ќе има 13 млади играчи, но за разлика од минатите сезони екипата ќе има многу ’подолга клупа’. Како што информира Червар, македонскиот првак сезонава во ростерот ќе има 73 проценти македонски играчи и 27 проценти ракометари од странство. „Преку 40 отсто од играчите во тимот имаат меѓу 18 и 22 години, од нив осум играчи се високи преку два метра. Ова што ние сакаме да го направиме е добро за ракометот во Македонија и за репрезентацијата на Македонија“.Младите играчи тренерот на Металург најмногу ќе ги користи во СЕХА лигата. Според Червар, Металург го поддржува проектот СЕХА лига која константно се движи напред, но додека не добие вистински легитимитет во ЕХФ, клубот ќе ја користи за афирмација на младите ракометари.Кога станува збор за домашното првенство клубот ќе стори се за да ја одбрани шампионската титула./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.