Домашен
Червар: Победата над Војводина ни донесе задоволство
Ракометарите на Металург во Нови Сад ставија крај на серијата од четири порази кои ги забележаа во Лигата на шампиони.
Металург в сабота ќе го пречека Борац во СЕХА лигата, и ќе се обиде да забележи уште една победа која дополнително може да ја подигне разнишаната самодоверба во тимот. „По прекинот на натпреварувањето во Лигата на шампионите, ние се вклучивме во натпреварите во СЕХА лигата. Победивме во Нови Сад, што, по сите порази во Лигата на шампионите, донесе задоволство во нашите редови. Не мислам дека со еден натпревар се постигнува којзнае што, особено што секој натпревар е приказна за себе и на секој треба да му се пријде со желба да се победи. Но, мислам дека делам едно задоволство со играчите, зашто во Нови Сад имаше одлично расположение во екипата и покрај претходниот висок пораз од екипата на Кил. Тоа што охрабрува е што младите, како Талески и Нелоски, имаа голема минутажа, а така ќе биде и на средбата против Борац. Уште еднаш ќе потенцирам дека ние не се откажуваме од никој од ракометарите кои ги удриле темелите на оваа екипа. Овој клуб има минато, но треба да има и иднина. Секако дека нашата цел и во СЕХА лигата е да одиме на победа на секој меч, но паралелно со тоа работиме на проектот на силен Металург, со голема перспектива пред себе. Проектот е долгогодишен и бара трпение“, рече тренерот на Металург Лино Червар. Металург во досегашниот тек од СЕХА лигата има три победи и два пораза, додека Борац во седумте натпревари има забележано само една победа. Дуелот на двата тима ќе се одигра в сабота со почеток во 20:15 часот во СЦ „Борис Трајковски“./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.