Домашен
Червар промовиран во нов селектор: Репрезентацијата е над поединецот
Лино Червар во средата официјално беше промовиран во нов селектор на машката сениорска репрезентација. Првиот човек на Ракометната федерација на Македонија (РФМ), Живко Мукаетов, на прес-конференцијата објави дека со трофејниот тренер е договорена четиригодишна соработка. Червар, покрај селекторската функција во сениорската репрезентација, ќе биде и координатор на работата на сите останати машки селекции на Македонија.
„Големо задоволство за мене како претседател е што за селектор ќе имаме човек кој е олимписки и светски првак и човек кој многу придонесе за развојот на ракометот во Македонија. Нашата визија и стратегија е со Лино Червар да работиме на долги патеки, идејата е да работиме заедно минимум четири години. Тоа не се однесува само на А селекцијата, туку очекуваме Червар да ја координира работата на сите машки селекции на Македонија“, рече на промоцијата на новиот селектор првиот човек на РФМ, Живко Мукаетов.Лино Червар, долгогодишниот тренер на Металург, освојувач на златен олимписки и светски медал со репрезентацијата на Хрватска, на кормилото на репрезентацијата доаѓа на местото на својот сонародник Ивица Обрван, кој со Македонија не успеа да избори пласман на Олимписките игри во Рио де Жанеиро.„Сите ме прашуваат зошто сега се решив да ја преземам Македонија, во најлошиот момент кога најголемиот сон Рио де Жанеиро не се оствари. Јас сакам сега кога е најтешко заедно со РФМ, со играчите и соработниците, со сите оние во чие срце е ракометот да ја продолжиме македонската ракометна приказна и на следните големи натпреварувања кои се пред нас. Паралелно со овие цели мораме заеднички да работиме на натамошното развивање на македонскиот ракомет. Да водиш репрезентација на една држава е голема чест и одговорност, затоа што ракометот ја претставува и државата Македонија. Исто така, да играш за својата татковина претставува најголем спортски успех и признание“, рече на Червар.Првата задача којашто стои пред новиот селектор е јунскиот бараж со селекцијата на Чешка, преку кој треба да се обезбеди пласман на Светското првенство во Франција, наредната година.Червар најави дека во пресрет на јунскиот бараж нема премногу да експериментира со составот, ќе играат оние кои неколку години наназад ја носеле играта на националниот тим. Подготвен е да разговара со сите и рече дека на сите кои сакаат да играат за Македонија вратите на репрезентацијата им се отворени. „Сите кои сакаат да играат за Македонија од моја страна вратите им се отворени, но кога ќе дојдат во репрезентацијата на прво место е репрезентацијата на Македонија, а потоа поединецот. Јас ќе сторам се да створиме тим, тоа е предуслов за добри резултати. Во овој момент пред баражот со Чешка најголем противник ни е времето. За тие две средби нема многу да менуваме, најважно ќе биде да створиме добра хемија внатре во тимот. Екипата доживеа шок не се пласира во Рио, тоа е тешка задача за секој селектор, но јас се надевам дека со помош на играчите ќе се пласираме во Франција“, дополни новиот македонски селектор.Инаку, на Червар во работата со репрезентацијата ќе му помага екс-селекторот Илија Темелковски.„Драго ми е што Илија Темелковски веднаш прифати да биде мој помошник. Не е тој без причина тука, јас него многу го почитувам, тој е македонска легенда. Мислам дека тукму тој требаше да биде со нас за овие две важни средби, да успееме да се пласираме на СП“./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.