Домашен
Даниел Кајмакоски стана промотор на македонската фудбалска репрезентација
Даниел Кајмакоски, победникот на првиот регионален Икс фактор, официјално беше претставен како промотор на настапите на А репрезентацијата на Македонија.
Посакувајќи му добредојде во фудбалското семејство, претседателот на ФФМ Илчо Ѓорѓиоски истакна дека вербата во себе, упорноста и истрајноста се карактеристиките кои не поврзуваат и ќе бидат заедничко мото во квалификацискиот циклус за пласман на Европското првенство.
„Нè радува соработката со Даниел Кајмакоски како заштитно лице на ФФМ и репрезентацијата во квалификацискиот циклус. Даниел е млад човек со интересна животна приказна. И покрај сите тешкотии и препреки веруваше и верува во себе и своите квалитети и никогаш не се откажува од својот сон. Тежок е патот до успехот, за да се стигне до него потребна е многу напорна работа, но пред се верба во себе, упорност и истрајност пред сите препреки. Токму овие карактеристики не поврзуваат со Даниел и ќе бидат заедничко мото, водилка на патот кон успехот“, изјави претседателот на ФФМ, Илчо Ѓорѓиоски.
Даниел Кајмакоски го потенцираше задоволството од потпишаната соработка со ФФМ.
„Во следниов квалификациски циклус ќе ја имам таа чест да соработувам со ФФМ и се радувам на тоа како мало дете, што имам мој дрес со број и име. Се запознав со играчите во Шпанија и ме одушеви тоа што добро ме прифатија како пријател. Едно е јасно, дека без поддршка од нашите луѓе немаше да го постигнам успехот кој го имам. Фудбалот е спорт со кој јас израснав, и до ден денеска го сакам со не помала страст. Како и за многу други работи во животот, упорноста, напорната работа се повеќе од неопходни за успех. Јас до мојот успех стигнав со поддршка од целокупната нација. И на овие фудбалери им треба безрезервна поддршка за да дојдеме до посакуваните успеси на европската сцена“, рече Кајмакоски.
Даниел Кајмакоски ќе има музички настап на Националната арена „Филип Втори“ еден час пред почетокот на натпреварот Македонија – Луксембург на 9. октомври.
Фудбалската федерација на Македонија ќе овозможи бесплатен влез за ученици од прво до осмо одделение, за деца без родители, и од социјално ранливи категории за натпреварот Македонија-Луксембург кој ќе се одигра на 9. октомври, со почеток во 20:45 часот. Децата можат да дојдат на натпревар заедно со родител, а потребно е само истиот ден, по можност порано во текот на денот, да покажат ученичка книшка на билетарата на арената „Филип Втори“ и да го подигнат бесплатно својот билет. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.