Домашен
Докузовски: Го молевме судијата да го продолжи натпреварот
Ниту еден тренер во светот не би се решил да им забрани на играчите да излезат на паркетот во една речиси добиена ситуација против исклучително силен противник.
Ова го вели тренерот на кошаркарскиот клуб Работнички Марин Докузовски во писмената изјава во врска со казната од Дисциплинската комисија на МКФ за шестмесечна суспензија,
Докузовски е казнет бидејќи во записникот по натпреварот Работнички-МЗТ Скопје Аеродром беше наведено дека домашната екипа одбила да го доигра прекинатиот натпревар.
„Јас сум професионалец, чии ингеренции почнуваат и завршуваат на теренот, во работата со играчите. Навистина не ми е јасно зошто сум казнет, па уште и со шест месеци. Па, зарем верувате дека има барем еден тренер во светот кој не би дозволил продолжување на натпреварот во кој неговата екипа води со 16 поени разлика и тоа на 13 минути до крајот“, вели Докузовски.
Тој тврди дека не само што не ја повлекол екипата, туку заедно со поискусните играчи го молел судијата да го продолжи мечот.
„Зошто во записникот никаде не стои дека заедно со капитенот Петровски и со најискусниот Гечевски буквално го молевме првиот судија да го продолжи натпреварот. Дека од него баравме да се врати на паркетот. Зошто никаде не е наведено неговото арогантно однесување и не сакање воопшто да разговара со нас?“, се наведува во соопштението на Докузовски.
Тренерот на Работнички ја информира јавноста дека нема намера да се жали на одлуката и дека не се чувствува виновен.
Ако некој смета дека работите ќе тргнат на подобро во македонската кошарка ако шест месеци бидам надвор од неа, тогаш нека биде така, вели Докузовски.
Искусниот тренер не ја исклучува можноста дека во целата работа да е вплеткана политиката.
„Знам само дека до 2011 година, кога го направивме историскиот успех во Литванија, немаше политичари во македонската кошарка. Можеби и затоа направивме таков неверојатен резултат. Сега, пак, ситуацијата во клубовите е поинаква, а резултатите на репрезентацијата полоши. Можеби има некаква поврзаност, кој знае“, се наведува на крајот од соопштението на Докузовски. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.