Домашен
Иџе: Не ја давам европската круна
На македонскиот автомобилист, Игор Стефановски – Иџе, две трки до крајот на првенството му недостасува уште еден бод за да го задржи епитетот најбрз европски возач на ридски патеки
На македонскиот автомобилист, Игор Стефановски – Иџе, две трки до крајот на првенството му недостасува уште еден бод за да го задржи епитетот најбрз европски возач на ридски патеки
Македонскиот автомобилист Игор Стефановски – Иџе со победа во Швајцарија ја потврди високата класа и две трки пред крајот на Европскиот шампионат на ридски патеки е на чекор да одбрана на титулата. `Летечкиот Македонец` уште еднаш докажа дека нема рамноправен конкурент во ова натпреварување во групата Н и со вкупно време од 4:41.814 минути беше речиси 10 секунди подобар од второпласираниот Јиржи Лос од Чешка. Во групата А, триумфира второпласираниот во генералниот пласман Лукас Војачек, но само чудо може да го спречи македонскиот ас да не ја одбрани титулата. За таква разврска, Иџе треба да не оствари пласман на патеките во Словенија и во Хрватска, а Чехот да слави и на двете трки до крајот на шампионатот.„Ова беше исклучително тешка и напорна трка, пред се поради тешките временски услови. Немав друга опција освен да ризикувам на влажната патека, бидејќи немам намера да се откажам од европскиот трон. Според моите математики за нова титула потребен ми е само уште еден бод и се надевам дека ќе го освојам на следната трка за две недели во Словенија“, изјави Иџе.`Летечкиот Македонец` мината сезона победи во Швајцарија и ја освои првата европска титула, а тоа придонесе да стекне популарност кај овдешните фанови. Оваа година повторно ги израдува малубројните македонски фанови крај патеката, но за жал, не можеше со нив и да ја прослави и новата круна. „Ме израдуваа неколку македонски навивачи кои живеат и работат во Швајцарија и дојдоа да ме бодрат на оваа трка. Убаво е да се види развиорено македонското знаме на трибините. Тоа ми даде дополнителен мотив да дадам се од себе и да извојувам нова победа. Се надевам дека ги исполнив нивните очекувања и дека не зажалија што дојдоа на патеката и беа горди што се Македонци“, додаде Стефановски./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.