Домашен
Иванов ги прими младите фудбалерите: Направивте фудбалско востание во Македонија
Претседателот на Република Македонија д-р Ѓорге Иванов, денеска ги прими членовите на македонската младинска фудбалска репрезентација по повод пласманот на Европското фудбалско првенство за фудбалери до 21 година.
На средбата претседателот Иванов упати честитки до младите фудбалери, до тренерите и до претставниците на фудбалската федерација за освоеното прво место во групата, и истакна дека тој како и целата македонска јавност е горд на вчерашната победа над репрезентацијата на Шкотска и пласманот на претстојното европско првенство во Полска.
„Во годината кога славиме јубилеј, 25 години од нашата независност, вие ни ја донесовте најголемата радост. Вашиот успех покажа дека можеме да бидеме сите заедно, и сплотени и единствени да навиваме за Македонија. Ви благодарам на секој од вас за неговиот удел во оваа победа што ни ја приредивте, посебно за селекторот, за тренерите и за сите што инвестираа во вас. Ние веруваме во вас, порача македонскиот претседател. Вчера на 11 Октомври – Денот на востанието, вие направивте фудбалско востание во Македонија. Вие младите симболично покажавте за тоа што доаѓа и што допрва од вас ќе очекуваме, а тоа се нови подвизи и потфати“, рече претседателот Иванов.
Тој нагласи дека овие млади фудбалери се пресврт во фудбалот во независна Македонија и генерација на која допрва и претстојат забележителни резултати.
„Очекуваме ова што го почнавте, заедно да го продолжите и како генерација да бидете сплотени како што бевте на натпреварите. Заедно да се држите и да знаете дека целиот народ е со вас. Без разлика дали ние на стадионот сме Македонци, Албанци, Турци, Власи,Роми, Срби, Бошњаци во вакви моменти – сите сме Македонија. Македонија со успех каков што вие го направивте вчера“, им порача претседателот Иванов на младите фудбалери.
Селекторот на младинската фудбалска репрезентација г. Благоја Милевски се заблагодари за приемот од претседателот Иванов и рече дека со напорната работа ќе продолжат и во иднина.
„Вчерашната победа носи огромно задоволство, по една напорна работа и голем труд вложен во овие квалификации на овие момци, која се награди со пласман на Европско првенство. Тоа е огромно задоволство за мене како шеф на стручен штаб, и мислам дека самите репрезентативци имаат чувство на задоволство што одиграа не само вчерашниот натпревар туку и сите квалификации на едно ниво, што мислам дека никој не очекуваше тука кај нас, а уште помалку Европа“ рече Милевски.
Македонската репрезентација на Македонија до 21 година го освои првото место во третата група и директно се пласираше на Европското првенство во фудбал, кое идното лето ќе се одржи во Полска. крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.