Домашен
Кривична за фудбалер на Силекс, се обидел да го намести натпреварот со Металург
Министерството за внатрешни работи до Основното јавно обвинителство Скопје поднесе кривична пријава против С.В.(26) од Кочани, фудбалер во „Силекс“ од Кратово, поради постоење на основано сомнение за сторено кривично дело „неовластено давање на подароци“ по чл.253а ст.4 од КЗ на РМ.
„Пријавениот фудбалер, со цел да се стекне со противправна имотна корист за себе или друг, на четворица соиграчи им понудил-ветил подарок во вид на парични средства во износ од по 1200 евра за секој од нив, со цел на фудбалскиот натпревар кој што требало да го одигра ФК Силекс со ФК Металург на 18.05.2015 година да го завршат со негативен резултат за ФК Силекс, кој резултат не би зависел од спортската игра и правилата на спортскиот натпревар, на овој начин пријавениот го сторил кривичното дело „неовластено давање на подароци“ предвидено и казниво по чл.253-а ст.4 од КЗ на РМ“, стои во соопштението на МВР испратено до медиумите.
Полицијата на 23-ти мај била известена за случај на одигран сомнителен фудбалски натпревар меѓу ФК Силекс со ФК Металург за што од страна на полициските службеници превземени биле соодветни мерки и активности за негово докажување.
Ден потоа во просториите на Полициската станица Кратово биле извршени разговори со четворицата соиграчи на пријавениот и истите дале скоро идентично појаснување околу одиграниот натпревар, односно дека пред одигрувањето на натпреварот пријавениот им понудил парични средства во износ од по 1.200 евра за секој од нив, за да одиграат под своите реални можности со цел да го изгубат натпреварот.
Фудбалерите не ја прифатиле понудата од соиграчот и според нив, натпреварот го одиграле максимално професионално, при што натпреварот заврши со резултат 3:1 во корист на ФК Силекс.
Исто така фудбалерите рекле дека во три наврата (21, 22 и 23-ти мај годинава) биле контактирани од пријавениот поради потребата заедно да одат во Пробиштип за да остварат средба со четири лица, од кои две зборувале на македонски, а две на бугарски јазик.
Од разговорот и самиот настап на четирите лица, фудбалерите дошле до заклучок дека целиот проблем е во врска со одиграниот фудбалски натпревар со екипата на ФК Металург кога ФК Силекс победи со позитивен резултат (3:1), односно едно од лицата се пожалило дека се обложувало на наведениот натпревар и изгубило околу 40.000 евра.
„Поради губењето на паричните средства од обложувањето, од четворицата фудбалери побарале да им исплатат 15.000 евра, а остатокот до 40.000 евра (25.000 евра) да им го исплати пријавениот. Притоа на средбата им биле упатени и сериозни закани доколку не биде извршена исплата на паричните средства. По ова, веќе наредниот ден (22.05.2015 година) кога од страна на клубот им била исплатена плата, фудбалерите им ги дале исплатените плати, по што од страна на лицата им било кажано дека тие повеќе немаат никакви обврски кон нив и дека целиот проблем околу настанатата ситуација ќе го решаваат со пријавениот, кој со нив се договарал и гарантирал за конечниот резултат на натпреварот“, информираат од МВР.
Министерството за внатрешни работи продолжува да постапува по случајот и да работи на утврдување на идентитетот на инволвираните бугарски и наши државјани, како и евентуалната вмешаност и на други лица. крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.