Домашен
Милевски го објави списокот за мечот со Романија
Благоја Милевски, селекторот на фудбалската репрезентацијата на Македонија до 21. година го објави списокот на играчи на кои ќе смета за контролниот натпревар против Романија на 13. октомври на Националната арена „Филип Втори“ во Скопје.
На списокот на Милевски се наоѓаат играчи кои беа дел од оваа селекција и на претходните дуели. Селекторот за натпреварот со Романија го повика и играчот на Барселона Б, Давид Бабунски, кој не настапи на претходните две средби со Израел, со образложение дека во иднина ќе играл само за А тимот. „Ова ќе биде наш прв заеднички собир, но веднаш треба да ја сфатиме одговорноста и да се обидеме да се наметнеме пред фудбалската јавност во малку поинакво светло во однос на претходните квалификации. Рековме дека составот на репрезентацијата за натпреварот против Романија нема да трпи многу промени во однос на последниот квалификациски со Израел, составот на повиканите играчи може да трпи промени, конечниот ќе го имаме до почетокот на подготовките во Дојран. Иако сме во позиција кога треба да создаваме нова генерација на селекцијата до 21 година, сметам дека играчите кои се на списокот имаат потенцијал и квалитет, а низ разговорите со нив, сфативме дека и мотивот за докажување и позитивни резултати не недостасува, за нас е тоа многу важно и се надевам дека заеднички ќе напредуваме на секој тренинг или натпревар. Ни недостасуваат Илиев, Аврамовски, Марковски, Тошевски и Бејтулаи кои се повредени, а Радески и Велковски се во составот на А репрезентацијата. Основата на младата репрезентација ќе ја бараме во овој состав, но тоа не значи дека и останатите нема да добијат шанса. Напротив, за нас сите се активни репрезентативци, ги следиме и доколку играат во своите тимови ќе бидат повикани и во репрезентацијата. Натпреварот со Романија е пријателски, но ќе бараме резултат, во денешниот фудбал тоа е најбитното“, изјави селекторот на репрезентацијата, Благоја Милевски. Репрезентацијата на Македонија до 21 година ќе ги започне подготовките за натпреварот со Романија на 7. октомври. До 12. октомври тренинзите ќе се одработуваат во Дојран, селекцијата на ден пред натпреварот се враќа во Скопје. Контролниот натпревар Македонија – Романија се игра од 19.00 часот на во Скопје. За пријателскиот натпревар против романската селекција, Милевски ги повика следните фудбалери:Голмани:Дамјан Шишковски (Работнички), Игор Алексовски (Македонија Ѓ.П.)Одбрана:Филип Ристевски (Металург), Ѓоко Зајков(Рен, Франција), Јасир Асани (Вардар),Виктор Талевски (Брегалница Ш.), Висар Муслиу (Сент Гален, Швајцарија), Ангелче Тимовски (Силекс), Леон Најдовски (Македонија ЃП)Среден ред:Енис Барди (Ујпешт, Унгарија), Бесир Демири (Шкупи), Бурхан Мустафов (Палистер), Ѓорги Стоилов (Хоризонт Турново), Давид Бабунски (Барселона Б, Шпанија), Бобан Николов (Виторул Констанца, Романија)Напад: Валмир Нафиу (Хамбургер, Германија),Димитар Иванов (Вардар), Филип Пивковски (Новара, Италија), Демир Имери (Шкендија),Кристијан Костовски (Силекс), Виктор Ангелов (Металург). крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.