Домашен
Милевски со проверени сили по поволен резултат против Украина
Благоја Милевски, селекторот на младата фудбалска репрезентација на Македонија, повика 23-ца фудбалери за престојните две средби на оваа селекција, квалификацискиот со Украина и пријателскиот со Австралија.
Македонската репрезентација, квалификациите за пласман на ЕП ги започнаа со пораз 3:0 на Исланд. Покрај овие две репрезентации, во Групата 3 се наоѓаат Франција, Северна Ирска, Шкотска и Украина која е следен противник на македонските млади фудбалери.
„Украина доаѓа од вториот квалификациски шешир, станува збор за кквалитетна репрезентација која е составена претежно од играчи кои се стандардни во своите клубови во Украина, има неколкумина во Б тимот на Динамо Киев, додека капитенот игра во Баер Леверкузен. Јас можам да ветам дека сите кои се повикани ќе го дадат својот максимум. Се надевам дека формата на играчите ќе биде на повисоко ниво отколку што тоа беше на мечот со Исланд.“, рече на прес-конференцијата селекторот Милевски.
Инаку, селекорот за мечот со Украина ги повика играчите кои и претходно конкурираа за место во тимот. Меѓу повиканите има еден дебитант, тоа е Мевљан Мурати од Шкупи и четворица повратници кои не играа против Исланд поради повреди, тоа се Дени Илиев, Енис Барди, Христијан Денковски и Даниел Аврамовски. На спискот се најде и Демир Имери кој повикот на селекторот го заслужил со своите игри во Хоризонт Турново.
За оваа кампања селекторот не ги повика Доријан Бабунски и Филип Пивковски.
„За жал, тие двајца не се во комбинација за овие натпревари поради тоа што и двајцата се во потрага по нова средина. Доријан треба да замине на тест период во Англија, додека со Пивковски ситуацијата е статус кво. Сите ние очекуваме час поскоро тие да најдат нови тимови и да ги имаме на располагање за следниот квалификациски меч со Северна Ирска во октомври“, објасни Милевски.
Првиот собир младите репрезентативци ќе го имаат на 31. август во 10:30 часот во хотелот „Александар Палас“.
Тренажниот процес на подоготовките на 31. август, односно 1. и 2.септември ќе се одвива во тренинг центарот на ФФМ со почеток во 17 часот, а на 3. септември во 16 часот, а на 4. септември во 10 часот.
Натпреварот од квалификациската Група 3 против Украина ќе се одигра на 5. септември, а два дена подцна е пријателскиот меч со Австралија.
Списокот на Милевски за мечевите со Украина и Австралија:
Голмани: Дени Илиев (Арсенал), Игор Алексовски (Македонија Ѓ.П.), Дамјан Шишковски (Работнички)
Одбрана: Ѓоко Зајков (Рен), Дарко Велковски (Вардар), Филип Ристовски (Метаург), Бесир Демири (Шкендија), Висар Муслиу (Ренова), Мевљан Мурати (Шкупи), Филип Петрески (Мелбурн), Леон Најдовски (Работнички)
Среден ред: Бобан Николов (Вардар), Енис Барди (Ујпешт), Давид Бабунски (Барселона Б), Бурхан Мустафов (Пелистер), Даниел Аврамовски (ОФК Београд), Никола Кулески (ФК Сиднеј)
Напад: Марјан Радески (Шкендија), Кире Маркоски (Работнички), Христијан Денковски (Гронинген), Демир Имери (Хоризонт Турново), Виктор Ангелов (Металург), Ваљмир Нафиу (Апоел)./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.