Домашен
Одбраната и физичката подготвеност главни адути на кошаркарите
Цврстата игра во одбрана, добрата физичка подготвеност и брзата транзиција од одбрана во напад ќе бидат главните адути на машката кошаркарска репрезентација на претстојното Европско првенство.
Ова беше истакнато за време на дружењето на дел од репрезентативците со новинарите што во четвртокот претпладнето се одржа во Скопје.
Селекторот Марјан Србиноски изрази задоволство од досегашниот тек на подготовките и од настапот во првите три подготвителни натпревара, во кои нашата селекција оствари три победи.
„Секако дека сум задоволен од остарените три победи во три натпревара. Не е ништо спектакуларно, но е добро за атмосферата во тимот“, рече Србиноски.
Тој истакна дека недостигот од квалитет во однос на дел од другите репрезентации кои се во нашата група во Загреб ќе се обидеме да го надоместиме со цврста игра во одбрана и брзо отворање.
„Ќе играме цврста одбрана, со брзо отворање и транзиција, и ќе се обидеме да наметнеме наш стил на игра. Тактиката ќе зависи од противникот и од текот на самиот натпревар“, изјави Србиноски.
Македонскиот селектор рече дека во преостанатиот дел од подготовките ќе настојува да се подобри играта во транзиција од одбрана во напад.
Србиноски рече дека не го загрижуваат ситните повреди со кои се соочени дел од играчите, истакнувајќи дека станува збор за нормална работа и најави дека на следниот натпревар што Македонија во петок го игра против Венецуела во Гевгелија во игра неколку минути во игра ќе го пушти Ричард Хендрикс.
Селекторот истакна дека од големо значење за тимот е искуството и квалитетите кои ги поседува плејмејкерот Владо Илиевски.
„Станува збор за вистински професионалец. Неговото искуство е од големо значење за помладите кошаркари. Тој е вистински лидер на тимот“, рече Србиноски.
Претседателот на Кошаркарската федерација, Петар Наумоски истакна, пак, дека вистински потег било ангажирањето на Италијанецот Џакомо Браида за кондициски тренер на репрезентацијата.
„Добрата физичка подготвеност ќе биде од исклучително значење, особено на натпреварите во групата во Загреб, каде треба да се игра секој ден. Селекторот и играчите се многу задоволни од работењето на Џакомо“, истакна Наумоски.
Репрезентативецот Александар Костоски истакна дека неговата генерација, на која претстојното европско првенство ќе ѝ биде прв сериозен предизвик, е целосно подготвена да се носи со притисокот.
„Во екипата имаме и неколку искусни играчи, како што е Илиевски, браќата Стојановски и Самарџиски, но и мојата генерација е целосно подготвена да се носи со предизвикот. Селекторот треба да одлучи кој ќе биде носител на играта“, рече Костоски.
Додаде дека играчите се многу задоволни од работењето на новиот селектор.
„Србиноски ни е многу добро познат од порано на нас играчите. Знаеме што бара, и се прилагодуваме кон неговиот начин на работа“, рече Костовски.
Македонскиот национален тим настапите во Загреб ќе ги стартува со мечот против лутиот ривал Грција, а во второто коло противник ќе биде селекцијата на Холандија.
По овие два натпревара следи еден слободен ден, за потоа на 8-ми септември да се излезе на мегдан со домаќинот Хрватска. Мечот со Грузијците ќе се игра во рамките на четвртото коло на 9-ти септември, а натпреварите во Загреб ги затвораме ден подоцна со мечот против Словенија. /крај/мф/ап
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.