Домашен
Победата против Митјиланд е императив
Ракометарките на Вардар, в недела, ќе го одиграат натпреварот од третото коло во Лигата на шампионките, а противник ќе им биде дански Митјиланд. Противникот во Скопје доаѓа со две победи, додека ’црвено црните’ по двата воведни натпревари имаат половичен учинок.
Поразот на Вардар на домашен терен, во првото коло од Ѓер и изненадувачки лесната победа на Митјиланд во Унгарија во второто коло дополнително го зголемува притисокот кај ракометарките на Индира Кастратовиќ, кои по секоја цена ќе мора да го победат данскиот состав.
„Добро го познаваме тимот на Митјиланд, игравме против нив во нашата прва сезона во ЛШ, знаеме со какви ракометарки располага. Нам ни беше многу тешка неделата по поразот од Ѓер, беше тешко да ги вратиме работите во вистинскиот колосек. Митјиланд е тим кој во ниту еден момент не смее да се потцени, поготово тоа не смееме да го направиме сега, по нивната победа во Ѓер. Ние изминатите денови се подготвувавме за нивната игра и мислам дека нема да нè изненадат. Од голема важност за нас е што сите ракометарки се здрави. Недела се приближува, а за нас тоа е меч каде нема да калкулираме туку едноставно мора да победиме“, рече на прес конференцијата тренерот на Вардар Индира Кастратовиќ.
Митјиланд е типичен преставник на данскиот ракомет, форсира брза игра во текот на целиот натпревар и се обидуба голем број од головите да постигне од транзиција. Одговор на ваквата скандинавска игра треба да биде балсканскиот стил кој негува пред се силна и цврста игра во одбраната.
„Тренирав седум или осум девојки од Митјиланд кои што играат во националниот тим на Данска. Ова ќе биде натпревар во кој ќе се судрат скадинавската и балканската ракометна филозофија. Во кариерата често сум играл против екипи и репрезентации од Балканот и секогаш сум се среќавал со цврста игра, со многу контакти во одбраната. Данските екипи не сакаат да играат против такви екипи. Митјиланд одигра идличен натпревар и бев изненаден од нивната победа во Ѓер, но од друга страна сметам дека ние навистина имаме големи шанси да победиме в недела“, рече соработникот во стручниот штаб на Кастратовиќ, Данецот Јан Питлик.
Инаку натпреварот в недела ќе се одигра во СЦ „Јане Сандански“, во терминот од 15:15 часот. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.