Домашен
Прв мундијалски пораз, Хрватска ја совлада Македонија
Македонската ракометна репрезентација го запиша првиот пораз на Мундијалот во Катар. Во четвртото коло во Б групата, Македонија загуби од Хрватска со 26:29 (14:15). Хрватска со оваа победа, на коло до крајот, го обезбеди првото место во групата, додека Македонија против Австрија ќе се бори за втората позиција.
Македонија одигра уште еден добар натпревар на Мундијалот, но и со такво издание не успеа да ја изненади фаворизираната Хрватска, иако во првото полувреме го диктирше ритамот и во еден момент имаше предност од четири гола.Два лоши периоди во играта на ‘црвено-жолтите’ беа клучни за поразот, првиот од 22. до 30.минута кога Хрватска негативата од 13:11, ја претвори во водство од 14:15 и вториот од 37. до 47.минута и резултат 17:17, Хрватите со серија од пет гола стигнаа до клучната предност од 17:22.Првиот гол на натпреварот го постигна Манасков, потоа следуваше период во кој двете репрезентации постигнуваа голови. Добрата игра во одбраната и голманот Ристовски иницираа серија од три гола на Македонија и водство од 7:4 во деветтата минута. Во наредните пет минути Македонија постигна два гола, Хрватска еден за водство од 9:5, што го примора хрватскиот селектор да побара тајм аут.Советите делуваа врз хрватските играчи и тиа многу бргу стигнаа до израмнување 9:9. Македонија повторно успеа да се одлепи на 13:11 (22.минута), но до крајот на полувремето следуваше хрватската серија од 1:4, за конечни 14:15 по 30 минути игра.Второто полувреме повторно со гол го отвори Македонија, до резултат 17:17 репрезентациите се менуваа во водството, а потоа следуваше црниот период од 10 минути во играта на ‘црвено-жолтите’. Одбраната некако и функционираше, но нападот целосно зариба, голманот на Хрватска Мирко Алиловиќ одбрани неколку тешки удари, кои иницираа брза транзиција на неговите соиграчи и Хрватите во 47.минута стигнаа до клучната предност од 17:22.Се обиде Македонија да се врати во мечот, со три гола по ред резултатот во 52.минута беше 22:24, но Лазаров и екипата едноставно немаа сили за целосен пресврт.Кире Лазаров со седум гола беше најефикасен во македонската репрезентација додека по три гола постигнаа Стоилов, Манасков, Миркуловски и Георгиевски. Најефикасен во хрватскиот тим беше Чупиќ со девет гола, Дувњак постигна пет (сите во второто полувреме),а голманот Алиловиќ имаше 14 успешни интервенции. Македонската репрезентација следниот меч на Мундијалот ќе го одигра в петок против Австрија. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.