Домашен
Работнички ќе се надигрува со Трабзон
Фудбалерите на Работнички, по Флора и Јелгава, во четврток ќе се соочат со најголемиот предизвик во Лига Европа. Актуелниот освојувач на Купот на Македонија во третото квалификациско коло за противник го има турски Трабзон.
Трабзон е шесткратен шампион на Турција, во овој тим играат добро познати фудбалски имиња (Кардозо, Босингва, М’биа), кои од клупата ги предводи прославениот Грузиец Шота Аверладзе, но од таборот на Работнички не се плашат од името и квалитетот на противникот и најавуваат игра на победа.
„Ќе ни биде чест да се надигруваме со Трабзон, но не мислам ние во натпреварот да бидеме само учесници, туку ќе барам од играчите да одиграат на што е можно повисоко ниво и да се обидеме да оствариме што е можно подобар резултат. Верувајте, нема ништо да смениме во нашиот стил на игра кој го негуваме веќе две години, ќе имаме офанзивен пристап ќе играме на гол повеќе. Многумина пред вакви натпревари се служат со фразата дека на ваков меч нема што да се загуби, но јас не се согласувам со тоа и имам друга девиза дека ова е натпревар од којшто можеме многу да добиеме“, рече на прес конференцијата шефот на стручниот штаб на Работнички, Игор Ангеловски.
„Трабзон е екипа која негува офанзивен стил на игра, на последните натпревари играа во формација 4-2-3-1, но очекувам дека против нас ќе има мали измени во нивниот тим, бидејќи верувам дека Оскар Кардозо ќе игра од првата минута. Имаат многу квалитетни поединци, ќе се обидеме да ги неутрализираме нивните добри страни во играта, а да го искористиме она што го воочивме како нивна слабост.
Тренерот на ‘романтичарите’ рече дека нема што да крие од својот колега на спротивната страна, го најави истиот состав кој го започна и мечот со Јелгава. Нападот на Работнички ќе го предводи капитенот Баже Илијоски кој вети дека ќе ја затресе мрежата на Трабзон.
„Стигнавме до третото коло, сега самодовербата ни е на високо ниво. Добро знаеме со каков противник се соочуваме, но ве уверувам дека не сме исплашшени, ќе ја играме нашата игра, ќе го дадеме максимумот и искрено се надевам доколку ќи искористиме нашите шанси дека можеме да победиме“, рече Илијоски.
Натпреварот во четврток ќе се одигра на „Филип Втори“ и ќе започне во 20 часот./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.