Домашен
Ракометарите се пласираа на мундијалот во Франција
Македонската ракометна селекција во средата вечерта во спортскиот центар „Борис Трајковски“ со мотивирана и супериорна игра успеа да го надомести заостанувањето од минатата седмица од Злин кога беше поразена од Чешка со 22-28, и со 34-27 се пласираше на Светското првенство кое ќе се игра во Франција во јануари следната година, обезбедувајќи го во континуитет шестиот настап на големите глобални и континентални турнири.
За подвигот по бледото издание во Злин бездуго придонесе и присуството на Наумче Мојсоски и Филип Миркуловски, кои последен пат настапија во репрезентативниот дрес.
Натпреварот започна со очигледна решеност на македонските ракометари да се вложат целосно во остварувањето на задачата, што веќе во шестата минута донесе позначајна предност од 4-1, а потоа со серија од 7-0 пред истекот на една третина од мечот веќе ја анулираа предноста на Чешка од Злин (13-5). Предноста продолжи да се зголемува и на полувремето изнесуваше солидни осум голови (19-11).
Македонските ракометари во ист стил го започнаа и второто полувреме и веќе во 36 минута создадоа десет голови разлика (23-13), а во 44 минута по трите обида беше остварена максималната позитива од единаесет голови (26-15).
Потоа следеше моментот на кој домашната публика е веќе навикната и неминовниот пад во темпото на македонските ракометари, што им овозможи на чешките со серија од 3-0 во 48 минута, да намалат на 27-19.
Во продолжение разликата постојано се движеше меѓу осум и девет голови, а на минута и половина до крајот Чесите намалија и на седум разлика. Сепак, искуството и присебноста на Лазаров и Мојсоски придонесоа да се одржи оваа потребна предност за пат во Франција.
Манасков беше најефикасен со 11 голови, осум постигна Кирил Лазаров, од кои шест во второто полувреме, а Миркуловски се прости од националниот дрес со стоотстотен учинок „шест од шест“. Прибак и Мојсоски додадоа по три погодоци, два имаше Георгиевски, а еден Стоилов. Борко Ристовски заврши со седум одбрани.
Кај Чешка повторно одличен на голот беше Мартин Галија со 11 одбрани, од кои три пенала, а прв стрелец беше Здрахала со шест голови.
Светското првенство во Франција ќе се одржи од 11 до 29 јануари вгодина, а ќе биде петто за Македонија, вкупно деветти настап на големите собири и шести во континуитет од 2012 година./крај/мф/цн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.