Домашен
Ракометарите сонуваат за четвртфинале на СП во Катар
Пласман меѓу осумте најдобри со изборен пласман во квалификациите за Олимписките игри во Рио де Жанеиро е целта на ракометната репрезентација на Македонија којашто во неделата ги започна подготвките за настапот на Светското првенство во Катар.
Во своето прво официјално појавување во јавноста по започнувањето на подготовките беа преставени и дресовите кои ракометарите ќе ги носат на Мундијалот во Катар, кој ќе се одржува од 15-ти јануари до 1-ви февруари.
„За нас во федерацијата Светското првенство во Катар е голем предизвик, бидејќи шампионатот се одржува на друг континент и во држава која масовно инвестира во спортот. Организациски очекуваме да биде различно од она што било претходно, па поради тоа презедовме одредени мерки, од типот репрезентацијата порано да отпатува во Катар за да може полесно да се адаптира“, рече на прес-конференцијата во петокот првиот човек на Ракометната федерација на Македонија, Живко Мукаетов.
За капитенот на националниот тим, Кирил Лазаров, подготвките се многу важни за да може селекцијата да ја оствари целта, а тоа пласман во квалификациите за Олимписките игри.
„Пред нас е еден голем настан. Веќе подолг период, уште од завршувањето на Европското првенство во Србија, а потоа и нашиот неуспешен настап во олимписките квалификации, оваа генерација потсвесно се подготвува долго време за она што нé очекува во Катар. Влогот е многу голем и ние сме свесно за тоа. Пред нас е едно тешко првенство, поради тоа важно е добро да ги одработиме подоготовките, бидејќи и нашите противници ја имаат истата цел, а тоа е пласман во квалификациите на Олимписките игри Јас лично верувам во оваа репрезентација, основата ја имаме. Ние ќе работиме за да можеме да биде рамноправни со големите репрезентации“ (Данска, Франција, Шпанија), рече најдобриот десен бек на светот, во изборот на реномираниот ракометен портал „handball planet.com“.
Селекторот на македонската репрезентација, Ивица Обрван, појасни дека до почетокот на празниците репрезентативците ќе работат на подобрување на физичката подогтвеност, а по Нова година ќе започнат со тактичките тренинзи.
„Веќе пет дена се подготвуваме за Катар и можам да кажам дека работите течат според планот. Најважно во моментов е што сите се здрави, немаме никавни проблеми со повредите и се надевам дека така и ќе остане. В недела не очекува контролниот меч со Израел, противник кој е по мерка за оваа фаза на подготвките. На тој натпревар ќе испробуваме тактички варијанти“, рече селекторот Обрван.
Македонските репрезентативци во Скопје ќе се подготвуваат до 7-ми јануари, а ден подоцна ќе замина за Франција кеде ќе учествуваат на турнирот во Нант, а по учеството на турнирот во земјата на европскиот првак ќе продолжи за Катар.
Македонската репрезентација во првата фаза ќе се натпреварува во Б групата заедно со националните тимови на Хрватска, Босна и Херцеговина, Австрија, Тунис и Иран.
Македонија првиот натпревар ќе го одигра на 16-ти јануари против Тунис, а потоа следуваат дуелите со Иран (17-ти јануари), Босна и Херцеговина (19-ти јануари), Хрватска (21-ви јануари) и Австрија (23-ти јануари)./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.