Домашен
Стефановски: Се чувствував како да возам на Водно
Најдобариот македонски возач, Игор Стефановски – Иџе убедливо триумфираше на четвртата трка од Европското првенство на ридски патеки, возена во Португалија на патеката Рампа да Фалпера во Брага.
За разлика од претходната трка во Шпанија, овојпат Иџе не дозволи ниту минимум неизвесност и сосема доминантно го освои првото место во својата група Н со неговото Mitsubishi Lancer Evo IX.
Веќе по првата трка беше јасно дека нема никаква драма бидејќи со време од 2:22.553 го остави Србинот Никола Миљковиќ две секунди зад себе, а Чехот Јири Лос дури пет секунди. Обајцата конкуренти немаа шанси ниту да се приближат до времето на Стефановски. Сепак, во неговиот добро познат, бескомпромисен стил на возење, во второто возење Иџе спушти до 2:21.854 со што стави точка на трката. На крајот, Стефановски имаше вкупно време од 4:44.407, втор заврши Миљковиќ со 4:46.558, а трет Јири Лос со 4:52.515.
„Имавме интересна трка по онаа во Шпанија. За жал, поради лимитираниот простор не можевме да носиме гуми за двете трки, па така оваа во Португалија ја возев со пневматиците од Шпанија, па од тие причини не можев да го нападнам рекордот на патеката за мојата група, но генерално задоволен сум од резултатот. Одушевен сум од целата атмосфера, имаше премногу публика и фанови, скоро како да возам кај нас на Водно. Никаде досега не сум имал толку публика која навиваше за мене“, изјавил Иџе од Португалија.
Во наредниот период, тимот на Стефановски ќе се фокусира на поправка на возилото и пред се на дефектот со турбо полначот кој не работи со полн капацитет.
„Имавме многу напорна недела затоа што патував без механичар, единствено бевме јас и мојот татко, па така бев дополнително оптоварен со поставување на сет – апите и сите други потребни работи околу возилото. По враќањето во Скопје планирам да одморам неколку дена, а потоа продолжуваме за Полска на специјален сервис за да ги отстраниме сите технички проблеми и да го подготвиме возилото за идните трки каде што ќе имаме далеку посериозна конкуренција од домашни возачи“, рекол Иџе.
По двете едноподруго трки во Шпанија и Португалија, следува тринеделна пауза во шампионатот пред петтата трка која се вози во Чешка на 7 јуни. крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.