Домашен
Суслина го раздвижи Вардар, „црвено-црните“ славеа над Лајпциг
Ракометарките на Вардар во осмото коло, во Лигата на шампионките славеа над Лајпциг со 26:20 (10:9). Вардарки победата ја обезбедија во последните 15 минути од мечот, а до тримфот ги донесе Ина Суслина која имаше 15 одбрани.
Вардарки добро го отворија натпреварот, уште во почетните минути стигнаа до предност од два гола и истата ја одржуваа сé до средината на првиот дел (6:4). Потоа ‘црвено-црните’ направија неколку технички грешки, Лајпциг заигра цврсто во одбрана која му донесе серија од три гола и предност од 6:7.
На серијата на Лајпциг, избраничките на Кастратовиќ одговорија со иста мерка, постигнаа пет гола ја вратија предноста од два гола (9:7), а притоа пропуштија два напада за да се одлепат на три гола од противничките.
Финишот на полувремето им припадна на Германките кои постигнаа два гола и по 30 минути Вардар имаше предност од 10:9.
Работите на теренот не се сменија ниту на стартот од второто полувреме, двата тима играа цврсто во одбраната (на граница на исклучување), но вардарки не само што ја одржаа предноста, туку првпат на мечот стигнаа до позитива од три гола (14:11, 15:12).
И повтроно како и во првиот дел, вардарки влегоа во проблеми со организацијата на нападите, па упорните Германки во 45. минута се доближија на гол негатива (17:16).
По тајмаутот на Кастратовиќ вардарки влегоа во неверојатна серија која ја иницираше Суслина со серија брилијантни одбрани, таа им овозможи на своите колешки во наредните 10 минути серија од 7:0 и водство од 24:16, со која практично и беа решени дилемите околу конечниот победник.
Покрај Суслина, во тимот на Вардар се истакнаа Алтхаус со шест, односно Радичевиќ и Николиќ со по пет гола. Најефикасна кај Лајпциг беше Кудлач со пет голови.
Со оваа победа Вардар го прескокна Лајпциг на табелата. Во наредното коло ЖРК Вардар ќе му гостува на Крим Меркатор./крај/мф/нц
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.